Thianghlim takin i hmang ang u

Krismas kan hnaih ta hle mai. Vanglaini chanchinbu pawh vawiin hi kumin 2025-a a chhuah hnuhnung ber tur a ni ta. Kumtluana chawlh mumal pawh nei hlei thei lo chunga harsatna lian awm loa tun hun min hruai thlengtu Pathian hruaina a ropui tak zet a ni.

Media-te hi mi chanchin ziaka chhuah ṭhin kan ni a, mi ṭhenkhat tana thu lawmawm leh hlimna turte tihchhuah ṭhin a nih laiin, ṭhenkhat tana thu lawmawm lo leh mualpho theihnate chhuah loh theih a ni lo ṭhin.

Kumin bikah pawh mi rilru leh thinlung na taka siam kan nei mai thei a, tih dik loh palhte pawh kan nei ṭhin a ni. Heng zawng zawngah hian mipuiin hriatthiam thui tak an nei ṭhin a, a lawmawm hle. Chutih laiin, kan phû loha min faktute leh min fuihtute an awm ve reng bawk a, chungte chu min tiṭangtu leh min tichaktu an ni a, kan tan an hlu tak zet.

Mizo zinga tam tak chu Krismas leh kum thar hunpuiah hian an phâwklêk a, an sâhâwk ṭhin. Sual laka min chhandamtu Isua Krista pian champha, kan ngaihhlut em em hi mi ṭhenkhat chuan nun kawng sual zawh ṭanna hun atan te, nun pumpui a chhe zawnga her danglamtu leh hma lam huna inchhìrna tur thil tihna hun atante an lo hmang tawh ṭhin.

Kan hunpui ngaihhlut em em kan hman danah Mizo mipui, a bikin ṭhalaite fimkhur ila, a hnu lama kan inchhîrna tur leh kan nun kal zel tur tichhe thei thil kan tih loh nan rilru fîm tak nen hmangin lawm ṭheuh thei ila a duhawm. Hman nawm tum lutuk hi thil ṭha lo leh dik lo min tihtirtu a ni fo a, rilru dik tak pûa insûm thiam a ṭul.

Krismas hi a neitu Isua Krista duh danin hman tum ṭheuh ila, mahni chhungkua leh khawtlangah harsatna leh buaina thlentu ni loin, remna leh malsawmna thlentu ni tum ṭheuh ila. He hunpuiah hian sorkar leh kohhrante duh loh, sorkarin a khapte ti lui lo tlang ṭheuh ila tih hi duhthusam a ni. Chutianga thianghlim taka kan hman ngat chuan a ṭha zawnga Krismas hriat reng tlâk a ni ngei ang.

Vanglaini chhiartute Krismas leh kumthar hlim leh lawm taka an hman ṭheuh kan duhsak a; mahni hmun ṭheuhah mi dangte duhsakna leh hriatthiamna rilru pu chunga hmang turin duhsakna chibai ṭha ber kan hlàn e.