Police-te ṭang sauh sauh zel se

Home Minister chuan tun hnaia state police conference a hmanpuinaah, police hna chu misual hrem tuma beih ringawt a ni lo a, ram leh vantlang nun him leh ralmuang siam te, pawikhawihna thleng lo tura hmalakte a nih tel thu a sawi.

Police chungchanga Home Minister sawi hi a pawimawh a, mipui pawhin kan hriat reng a ṭha. Mi ṭhenkhat chuan police an hmuhin hlauhthâwnna eng emaw an nei mai ṭhin a, hei hi police nihna tan hriat tâwk loh vang a ni fo. Police-te hi hlauh ngawt tur an ni lo a, chutih rualin, zuam lutuk tur pawh a ni chuang lo. Mi ṭha leh dik, pawi khawih lo leh dan bawhchhiat nei lo tan police-te hi an hlauhawm loh.

Police uniform hi a zahawm a, mipuiin kan zah tur a ni a, anmahni police-te pawhin an zah tur a ni. Mipui mithmuhah police uniform zahawmna vawn him an tum tur a ni a, uniform ha chunga thil ṭha lo lam tih hi a mawi lo. Uniform ha chungin an rûi mai mai tur a ni lo a, vaihlo zûk leh hmuam thlengin mipui hmuhah an insûm a ṭha.

Tunlai thiamna ṭhang chak tak hi police-te hian man phâk tura an inzir zel a pawimawh. Thiamna sang zel hi pawikhawihna atan miin an hmang ṭangkai fo a, chutiang a nih avang chuan police-te'n tunlai thiamna an ûm phâk a ṭul. Thiamna leh hriatna ṭha zawk nei turin an inzir peih a ngai a ni.

Police-te hi ram leh khawtlang râlmuanna atana thawktu, dan bawhchhiatna vengtu, mipui thlamuantu an ni a; hei hi anmahni police-te leh mipuiin kan hriat reng a pawimawh. Khawtlang rálmuanna tur te, sualna leh pawikhawihna thleng thei vên kawngah te theihtawp chhuah zel se, ram leh mipui tan kan police-te hi han ṭang sauh sauh teh se.

Kan police-te hian mipui tana nêlawm taka an awm thiam a ṭha; mipui rîkrâp zawng phei chuan an che mai mai tur a ni lo a, khawi hmunah pawh mipui thlamuantu nih an tum zawk tur a ni. Hunpui kan thleng chho mek a, heng hunah pawh hian mipuite'n thlamuang tak, zalên leh hlim taka hunpui an hman theih nan kan police-te'n theihtawp an chhuah a ngai a ni.