Private hospital-te'n MUHCS zawm zel se

Health Minister chuan Mizoram Universal Healthcare Scheme (MUHCS) hnuaiah December 16, 2025 thlengin mi 59,602 enkawl an ni tawh a, chung damlote enkawlna atan chuan sorkarin cheng vbc 100.52 a sên tawh thu a sawi. MUHCS chu Aizawla mimal damdawi-in ṭhenkhatte'n an zawm dawn thu a sawi bawk.

Mizoram sorkarin healthcare scheme a kalpui mek hi damlote'n inenkawlna man an pek ngai lo, a thlâwna inenkawl theihna (cashless) a ni. Pawisa pek nghal ngai loa inenkawl theih a ni hi a lawmawm a, khawsak harsa zawkte tan a lawmawm lehzual. Tun dinhmunah chuan India rama state/union territory sorkarin healthcare a kalpuiah chuan a ṭha berte zinga mi a nih a rinawm.

MUHCS hi a tìr lamah kohhran damdawi-inte'n an zawm vek lo a, tunah chuan an zawm deuh vek tawh niin a lang a; a lawmawm. Aizawla mimal damdawi-in, a bikin mipuiin an pan nasat deuhte chuan an la zawm lo hlawm a; chutih laiin, private hospital ṭhenkhatin an zawm dawn thu leh inremna ziah thuai a nih dawn thu Health Minister-in a sawi a, a lawmawm.

Mimal damdawi-in zinga mipuiin an pan nasatte hi chu MUHCS an zawm lo chung pawhin mipuiin an pan nasa viau tho a, khumte pawh a khat deuh renga sawi a ni. Chutiang chu ni mah se, mipuiin damlohna thilah sorkar zár an zo theih nan private hospital ṭha ber berte hian MUHCS zawm ve tawh se tih hi mipui duhthusam a ni.

Aizawla private hospital-te'n MUHCS an zawm loh chhan an sawi lian deuhte chu cashless leh rate a ni. Sorkarin MUHCS a kalpui tawh china bill a pek dan ngaihtuahin, cashless chungchangah hian hlauhthawn tur a awm lêm lo niin a lang. Chuvangin, mimal damdawi-inte hian medical bill chungchangah hian sorkar hi ring ngam tawh se a duhawm.

Rate chung-changah pawh inbiak rem theih a nih a rinawm. Synod Hospital chungchangah Synod leh sorkar lamin tawlh hniam chin nei ve vein an inrem thei. Chutiang bawk chuan private hospital leh sorkar te hi tawlh hniam chin an neih ve ve a ngai tih hriain, inbe rem zel thei se, mipui tan a hlu hle ang.

Private hospital tan MUHCS an zawm hian an damdawi-in hlutna tizualtu a nih a rinawm a, mipui nawlpui duh dan pawh a ni a, mipui thinlunga hmingṭhat lehzualna a ni ngei ang le.