Social media-ah insûm a ngai

Tun hnaia Mizoram chhung hmun pahnihah tualthihna nia lang a thleng a, a pawi hle. December 1, 2025 aṭanga bo Tanhril nula pakhat chu December 13-ah a ruang hmuh a ni a, December 14, 2025-ah Farkawn pa pakhat a thi bawk. Heng mi pahnihte hi mi kut tuara thi an nia rin a ni.

Tualthihna nia rin pahnih hian sawi zui a hlawh a, mi tam takin social media-ah ṭawngkam déngkháwng tak takin an sawi zui a ni. Mi tam takin an sawi zui dan hi a tuartute thlavâng hauhna a nih rualin, tam tak chu a tuartute leh mi dangte tana chhiar/hmuh hrehawm tak turte a ni hlawm.

Thil eng emaw a thlen chánga social media-a buluk leh ṭawngkam déngkhâwng tak taka sawi zui hi a ṭha lo a, hmuh leh chhiar a nuam lo ṭhin. Thil kan sawi (comment) hmain rilru fím taka ngaihtuah hmasak a ṭha a, thinrim vanga thil sawi mai mai lo tura insûm a ngai. Comment tam tak hian awmzia a nei lêm lo a, chuvang chuan comment kher loh pawh a ṭha hle.

Tun hnaia thihna thleng pahnih hi a chhuitu tur dik tak police-te'n an chhui mek a, thihnaa inhnamhnawiha ngaihte pawh lain, thu an zawtfiah a, hma an la mek. Police-te hmalakna hi rin ngam phawt a ṭha a, a engamah hmaa lo rinhlelh nghal ngawt tur a ni lo.

Pawi khawihna lian tham, a bikin tualthihna ang chi-ah hian thil lang chiang nghal ruak a awm theih rualin, lang chiang nghal lo a awm fo a; uluk leh fimkhur taka chhui a ṭul ṭhin. Hei hi mipui hian kan hriat chian a ngai a; lo táwngpáwng hmanhmawh chiam a ṭul lo a, a ṭha lo bawk. Hmanhmawh lutuk vanga ṭul lo leh dik loa mi dem chiam theih a ni tih hriat a ṭha.

Social media-ah mi ṭhenkhatin 'justice for' tiin eng eng emaw an thehdarh zung zung a, hengte hi thil ṭul a ni lêm lo thei. Police lamin hma an la ṭha lo a, an che chak lo tih pawh a awm hma hmaa social media hmanga lo nawr chiam chiam a ṭha lo; thuneitute kan ring ngam phawt tur a ni.

Thuneitute'n hma an la ṭha lo emaw, an bawhzui muang lutuk emaw a nih erawh chuan media hmang emaw, thil tih hmang emawa nawr erawh thil àwm tak a ni ang.