Ruahmanna khawng taka kenkawh

Krismas hunpui kan thleng chho mek a, Aizawl leh khawpui dang ṭhenkhat bazarte a lûn a, mipui an tam tawh a, Krismas bazar vanglai a ni. Chhun leh zanah mipui chhuakvâk an tam a, lirthei tlân chhuak pawh hun dang zawng aiin an tam mek.

Hunpui vuakvêtah mipui rilru a phâwklêk ṭhin a, mi tam tak chu an sâhâwk ṭhin. Hei hi Krismas vuakvêta Mizo nihphung pakhat a ni. Mi dang awm dan avangin engtin emaw tak awm ve duhna te, eng emaw tih duhna te kan nei fo a, chu chuan chhuahvah châkna leh duhna min neihtir niin a lang.

Tunlaiin Lammualah Winter Festival neih mek a ni a, kar hmasaah Youth Festival neih a ni bawk. Festival-te hi mipuiin an hlut a, mi tam takin an chhim a, intihthawhvenna leh intihhlimna atan atante an hmang a, thil ṭha tak a ni. Thil ṭha tak a nih rualin, mi tam tak tana harsatna thlentu a ni ve fo tho bawk a, chuvangin, festival huaihawttu lamin ruahmanna mumal tak an neih a ṭul ṭhin.

Youth Festival-ah khan mipui an tam a, lirthei pawh a tam. Lirthei hûnna (parking) chungchangah ruahmanna a ṭha tâwk lo niin a lang a, traffic jam a nasat phah em em. Kha Festival kha mi tam takin nuam an ti a, an hlâwkpui laiin, mi tam takin harsatna an tawh phah ve bawk a ni.

Rîkrum thil, chhiatna emaw, damlo, nunna chhan tura hmanhmawh ngai bikte emaw inken theih miah loh khawpin traffic jam a nasa ṭhin a, hetiang hi a ṭha lo. Pawi nasa tak a thlen theih avangin, chutiang ni lo tur chuan ruahmanna ṭha tak neih a ngai.

Winter Festival neih mek a ni a, chhimtu mipui an tam. Mipui ṭhahnem hle mai se, traffic jam erawh a ziaawm ta deuh hlek a; thuneitu lamin traffic leh motor parking chungchangah ruahmanna felfai zawk an nei a, an kengkawh ṭha bawk niin a lang a, a lawmawm. Mipui an tam tial tial mai thei a, traffic jam a nasat lutuk loh nan ruahmanna siamte ṭha tak leh khawng taka kenkawh zel ni rawh se.

Mipui lam pawh hawihhâwm taka an chêt a, thuneitu lamin ruahmanna an siamte ṭha taka an zawm a ṭul. Kan remchanna leh awlsamna ringawt kan ngaihtuah tur a ni lo. Kan hlimna leh lawmna hian mi dang harsatna a thlen loh nan insiam rem thiam a ngai e.