Lirthei khalh leh dan zawm

Aizawl Traffic SP chuan December 15, 2025 khan hriattirna a chhuah a; Aizawlah kea kalte him zawk nan leh harsatna an tawh loh nan lirthei neitute leh khalhtute chu an lirthei hman dan leh dah (park) danah fimkhur turin a chah a, kea kalna dâla dah lo turin a hriattir.

Traffic SP tarlan danin, kea kalna (footpath)-a lirthei dah hi danin a phal loh a ni a, man theih an ni; hei hian rei lo tê dah zawk pawh a huam. Footpath-a lirthei dahte chu Traffic Control Room phone number 9366553559-ah thlalak nen hriattir zel tura ngen an ni.

Aizawl Traffic SP hriattirna tihchhuah hi a pawimawh em em a, mi tinina zawm tur a ni. Danin khap lo pawh ni ta tehrêng se, a hnawksak hrim hrim a, mi dangte tibuaitu a ni fo.

Footpath-a lirthei dah hi kea kalte tan a hnawk a, mi dang tibuaitu leh harsatna thlentu a nih ṭhin avangin mipui zahlohna a tling. Footpath-a lirthei dah chut chut chíng ni lo tura rilru dik put tlân a ngai a, mahni remchanna leh awlsamna ringawt zawng tur a ni lo a, mi dang ngaichân ve ṭhin tur a ni.

Kawngpui leh footpath kan hman dan te, lirthei khalha kan awm dante hian kan mizia, kan nihna, kan chîm chin a lantir ṭhin. Mi tam tak chuan lirtheia an ṭhut luh chiah hian an chapona nghal mai emaw tih mai tur a ni fo. Thil danga hawihhâwm tak ṭhin ni si hi, lirthei khalhah hawihhâwmna an tlachham fo. Chuvangin, lirthei khalhtute hian hawihhâwmna an lantir a ṭul a, dawhtheihna an neih a ṭul bawk.

Traffic police lam pawhin Aizawl khawpuia kawngpuite hi an vil ngun lehzual a ngai. Footpath-a lirthei dah hmuh tur a awm fo a, traffic police-te pawhin an hmuh ṭhinin a rinawm. Mahse, footpath-a lirthei dahte chu an man ṭhin rêng em tih hi ngaihtuah tham tak a ni.

Footpath-a lirthei hi a tak taka ngaimawh a ngai a, hriattirna chhuahah duhtâwk mai loin, a taka bawhzui a ṭul. Ṭha taka bawhzui a nih si loh chuan awmzia a nei tak tak kher lo ang. Footpath-a lirthei dah chungchang bakah, lirthei kaihhnawih dante hi thuneitute'n khawng lehzuala an kenkawh a ngai a; dan bawhchhiate chu inhriatthiamna leh inngaihdamna awm loa man a, dan anga an hrem zel mai a ṭul a ni.