Jordan Centre leh Synod thutlukna

Synod Inkhawmpui vawi 102-na chuan ruihhlo ngaite enkawlna hmun atana sorkarin a din Jordan Centre, Seṭhawn chu enkawl an remti a; enkawl tura hmalak ngaite bawhzui turin Synod Executive Committee an ruat. Kum 2026-27 budget an pawm tâkah Jordan Centre pualin cheng nuai 200 dah an remti nghal bawk.

Jordan Centre hi sorkarin a enkawl hleih theih loh avangin mi dang enkawltir (outsource) tumin sorkarin hma a la a, mahse, enkawl duh a hmu zo lo. Sorkar chuan enkawl turin Mizorama kohhran lian ber Mizoram Presbyterian Kohhran a ngen leh a; Synod chuan a ṭulna leh pawimawhna te, ramin a mamawh dante hriain enkawl turin thutlukna a siam ta a ni.

Mizoram Synod hian Jordan Centre enkawl tur hian sum leh pai tam tak sên belh a ngai dawn tih a hre chiang ang a, chuti chunga ram leh mipuiin an mamawhna hriaa Jordan Centre enkawl tura thutlukna a siam hi a lawmawm tak zet; an inpekna a ropui.

Mizoramah ruihhlo a hluarzia leh ruihhlo ngai tamzia kan hria a, sawi a tam em em. Ruihhlo ngaite enkawlna hmun chungchangah pawh sawi a tam a, mi ṭhenkhat chuan sorkar leh kohhrante na tak takin an sawisel bâwng bâwng ṭhin. Kohhran leh sorkar sawisel hi a àwmna chin a awm a; chutih rualin, sawiseltu tam berte erawh ruihhlo dona leh ruihhlo ngaite chhanchhuahna tura tha thawh ngai lem lote an ni ang.

Synod-in Jordan Centre a enkawl dawn tâkah chuan ruihhlo ngaite enkawlna leh chhanchhuahna lamah nasa lehzualin hma a la dawn tihna a ni a, a lawmawm a, a ropui. Rawngbawlna zau zawk a neih belh dawn a, inpekna thûk tak neih zui zel a ngai ang.

Kohhran hi hruaitute ringawt hmangin a kal thei lo a, mipui tel loin a kal thei lo. Jordan Centre enkawl chungchangah pawh, Synod-in a enkawl theih chhan tur chu kohhran mipui an ni. Chuvangin, Synod inpekna hi kohhran mipuite'n ṭha taka an thlâwp a, thilpekah ṭan an lak ve a ṭulin a rinawm.

Jordan Centre enkawl hi sum leh pai lamah a hautak dawn a, sorkar hi a indah àwl mai bik tur a ni lo a, sum lamah a puih ṭhin a ngai ngei ang. Kohhran pawl dangte pawhin Mizoram Synod hmalakna bilah ngai mai lo se, a remchan angin thawhlawm leh thilpek lamah ṭan lo la ve thei se a duhawm hle a ni.