Hâlpuah hâl duh lohna rilru put

Mizoram sorkar chuan kumin Krismas leh 2026 kum thar vuakvetah hâlpuah leh a kaihhnawih thilte a khap leh a, district hrang hranga district magistrate-te'n khapna thupek an chhuah tawh.

Halpuah leh a kaihhnawih thilte hi kum dangah pawh hunpui laiin khap a lo ni tawh ṭhin a, mahse, zawm a hlawh lo a, sorkar pawhin a bawhzui na tawk lo niin a lang. Nikum lam khan sorkar leh YMA lamin theihtawp chhuahin hma an la a, mahse, December 31 zanlai velah erawh hâlpuah hâl a ni nual ta tho a, kum dang ai chuan a ziaawm deuh niin a lang.

Police report-a a lan danin, kum 2024/2025 hunpui vuakvetah Aizawl district-ah police-te'n hâlpuah leh a kaihhnawih thil khapna thupek bawhchhia mi 53 an man a, thubuai 48 an ziak lut. Thubuai siamsak zinga mi 14 chu court-in thiam loh a chantir a, mi 16 chhuah zalen an ni. Thubuai erawh 17 chu court-ah a la inchiah thung.

Kan hma lawka hunpui kan thlen turah hâlpuah, hâlmawi a kaihhnawih dangte khapna chu ṭha taka kenkawh an tum thu Aizawl SP chuan a lo sawi tawh a ni.

Sorkar lamin khapna thupek an bawhzui ṭha lo tâwk a, hâltu an tam ngaihtuahin hrem an tlem em em ṭhin. Hei hian mipui thinlungah hâlpuah khapna thupek ngaih pawimawh lohna a siam niin a lang.

Hâlpuah leh a dangte khapna hi a hlawhtlin theihna tur chuan sorkar a ṭan hle a ngai a, halpuah hal duh lotu YMA lam pawhin anmahni huam chhung ṭheuhah nasa zawka ṭan an lak a ngai. Halpuah hâl tam ber hun, December 31 zanah phei chuan ṭan lehzual a ngai a, hâlpuah hâl rêng rêng chu man a, dan hmanga thubuai siamsak zel a ṭul.

Hâlpuah khap beh hi thil harsa a ni a, a pawimawh zawk chu–hâl duh lohna thinlung neih a ni. Mipui hian sorkarin dan a neihte leh thupek a siamte hi kan ngaih pawimawh a ṭul a; dan leh thupek bawhchhetu ni loin, zâwmtu nih duhna leh tumna thinlung kan neih a ngai.

Mizo mipui tam zawk hian hâlpuah ṭhat lohna kan hre tawh a, a ṭha lo tih hre reng chungin kan hâl lui tlat ṭhin. Mite tana harsatna thlentu nih duh lo, mi tana malsawmna nih tum zawk ṭhin kan nihna hi hâlpuah chungchangah hian a taka kan lan chhuahtir a hun tawh a ni.