Ṭhalaite tan nasa zawka hmalak

Mizoram Youth Commission Chairman chuan December 11, 2025-a press conference a neihah MYC hmalaknate a puang a, sorkar term kal mek chhungin MYC kaltlangin Mizo ṭhalai 400 chuangin hna an hmuh tawh thu a sawi.

Mizo ṭhalaite'n ram chhung leh páwnah hlawh ṭha zawk an hmuh theihna tura MYC-in hma a lakpuina hian lehkha zir sang takte leh zir sang lem lote a huam vek a; an hmalakna rah chhuah lawmawm tak kan hmu mek zel. Ṭhalaite hmakhua ngaia MYC-in theihtawp chhuaha hma a la hi a lawmawm tak zet a ni.

MYC Chairman sawi danin, MYC hian tun hnai kum hnih chhungin hotel management, food & beverage training te, spa therapy training te, ram dang ṭawng zirna te, British Army-a luh theih dante an buaipui a ni. Chunga zir tur ṭul ang zir chhuak tawh Mizo ṭhalai tam takin India ram chhung leh pawnah hlawh ṭha tak neiin hna an thawk mek.

Mizo ṭhalaite zingah lehkha thiam sang tak tak an pun zel rualin, lehkha thiam sang aiin, zir sang lem lo an tam hle zawkin a rinawm. Hetiang a nih avang hian lehkha thiam tak tak hmakhua ngaihthah si loin, zir sang lo zawkte'n hna ṭha zawk an neih theihna tura hmalak a ṭul.

Zir sang zawk, lehkha thiam sangte chu mahni inhai kaw thei zawk tura ngaih an ni a; a ṭul anga kaihhruai leh puih a ṭul tho rualin, puih mamawh zawk chu zir sang lo zawkte an ni. Mizo ṭhalai, lehkha zir sang lo zawkte'n hna an hmuh theih nan kawng kawhhmuh, kaihhruai leh ṭanpui kawngah nasa zawka hmalak a ngai a; hemi kawngah hian sorkar, MYC leh department ten nasa zawkin hma an lak a ngai.

Mizo ṭhalaite'n state páwn lama hna an thawh hian kan state chhungah sum tam tak an rawn la lut a, Mizoram economy tihhmasawnna pakhat a ni. Tun aia tam zawk ṭhalai an chhuah zel phei chuan Mizoram economy-in a ṭhan phah thei dawn a, Mizoram tan a hlu hle ang.

Mizo ṭhalaite'n India ram chhung leh páwnah hna thawhna remchang an hmuh theih nan MYC hian nasa zawkin hma la se, theihtawp chhuah zel rawh se. MYC hmalaknate hi a pawimawh avangin sorkar pawhin sum leh pai tam zawk pe thei se a duhawm.