YMA-te'n kawng siam vil zui zel se

Central YMA hruaitute chuan December 6, 2025 khan NHIDCL hnuaia Vairengte leh Sairang inkar NH kawngpui short term maintenance contract-a siam mek leh PMGSY hnuaia Hlimen leh Lungleng inkar kawng siam mek an enfiah.

YMA hruaitute'n kawng siam an enfiahnaah hian, Vairengte leh Sairang inkar kawng siamtu contractor-te'n hna an thawh dan chu lungawithlak loh hlea an ngai thu an sawi a; contractor-te hian July 2025-ah hna an thawk ṭan a, July 2026-a thawh zawh tur a nih laiin, thawh tur zatve an la thawk lo vek a ni.

Hlimen leh Lungleng inkar kawng siamnaah pawh CYMA hruaitute chuan, chak tak si, ṭha tak sia thawh ni se an duh a, hna thawktute chu Mizo an nih angin ram tan theihtawp chhuah turin an kar a ni. An thawk ṭha duh lo emaw, an thawk ṭha thei dawn lo a nih chuan 'Mi dangin thawk mai rawh se' tih chu YMA ngaihdan a nih thu contractor an hrilh.

CYMA hruaitute'n Mizoram hmasawnna duha kawngpui siamte an a ṭhat zawk theihna tura hma an la leh, kawng siam mek an enfiah hi a lawmawm a, rah ṭha a chhuah ngei ang. Tun aia zing zawk hian hmun hrang hranga kawng siamte enfiah thei se a duhawm.

YMA ngaihdanah chuan Vairengte leh Sairang inkar NH siam chu contractor-te'n an thawk chak tâwk lo niin a lang a, a zialo hle. Kawng siamtute hi an inthlahdah deuh a ni thei a, harsatna eng eng emaw an nei a ni thei bawk.

Inthlahdah vanga kawng siam muang an nih chuan na zawka nawr an ngai tihna a ni a, thuneitu lamte'n an ngaihven a, an vil a, an nawr a ngai tihna a ni. Harsatna an nei a nih chuan an harsatna azirin hriatthiampui a ngaih chin a awm thei bawk ang.

Mizorama kawng siam chungchanga YMA hmalakna hi a lawmawm a; chak zawka siam a nih a, kawng ṭha leh tlo zawk siam a nih ngei theih nan YMA hian chak takin hma la zui zel se. Sorkar lam pawhin uluk leh ngawrh taka an vil a ṭul a, kawng siamna chhehvela awm khawtlang leh mipuiin an phak tawkin vil bawk se, awmzia a nei ngei ang le.