Dan loa khaw din engtin nge ni dawn?

Mizo Students’ Union chuan Mizorama dan loa khaw din (unauthorised settlement)-te dinhmun enfiah turin December 8, 2025 khan Aizawl an chhuahsan.

LAD-in data a neih MSU-in an tarlan dan chuan, April 2025 dinhmun angin, Mizoramah dan loa din khaw 11 a awm mek. Chung khaw 11-a sorkarin hma a lak dan, hmasawnna lam thil–sikul, kawlphetha, hriselna lam leh tui lama sorkar hmalak dante en an tum a ni.

Zirlai pawlte hian ram leh hnam thilah hma an la ṭhin a, hnam thilah phei chuan mipui vauchher berte zinga mi an ni. Ram leh hnam dinhmun tiderthâwng thei thil a awmin a che rang berte zinga mi an ni fo.

Mizo ram leh hnam himna tura zirlai pawlte'n hma an la ṭhin hi a lawmawm a, thil ṭha a thlen phah cháng a awm ṭhin. Dan loa khaw din chungchang pawh hi ram leh hnam khawih thil, nakin zela ram himna tiderthâwng thei a nihna lai pawh a awm a; an dinhmun enfiah tura MSU an che chhuak pawh hi a àwm viau.

Zirlai pawlte'n dan loa khaw dinte an enfiah hi a ṭhat rualin, an fimkhur erawh a ngai. Dan ang taka thuneihna nei an ni lo tih an hriat a ṭha a, an tih theih chinte pawh an hriat reng a ṭha a, dan pêl lutuka chêt loh a him. Lungawi lohna leh thinrimna tur zawnga chêt palh theih a ni a, chutiang ni lo tur chuan fimkhur a ngai a ni.

MSU hian Mizorama dan loa khaw din awm mekte chu kumin 2025 chhung ngeia tihtawp a nih theih nan hma la turin Mizoram sorkar an ngen tawh a; sorkar hian engtin nge a bawhzui erawh hriat a ni rih lo.

Dan loa chêtna hrim hrim hi a ṭha lo a, chutiang bawkin dan loa khaw din pawh a ṭha chuang lo. Sorkarin dan loa chêtna thleng tur an veng ṭhin a, dan loa chête an man ṭhin bawk.

Dan loa khaw dinah pawh hian sorkar thuneitute hian hma an lak a ngai a, dan loa khaw din na nâ nâ chu titawp àwm tak a ni a, sorkar hian hma a lak ran a ngai. Ram dang mi, dan loa Mizorama khawsa an nih phei chuan ngaihvena chêt vat vat a ṭul. Chutih rualin, dan loa khaw dina chengte chungah mihring an nihna angin diriam taka chet erawh a ṭha lo thung.