Thawh tamah ṭan la rawh se

Tuna Mizorama sorkarna chelh mektu ZPM party-in sorkar an siam chuan December 8, 2025 khan kum hnih a pumhlûm a; kum hnih chhunga sorkar hmalaknate ZPM Media chuan press mite hmaah an puangzar a ni.

ZPM Media Chairman chuan, ZPM kaihhruai sorkarin hmalakna ṭha a neih hrang hrang a tarlang a; ZPM sorkarin theihtawpin ram leh hnam tan hna an thawh thu leh, Mizoram tana ṭha ber paw chhuak turin hma lam an pan zel dawn thu a sawi.

Mizorama sorkar tawhte rêng rêng hian ram leh hnam tan thil ṭha tih an nei vek a, kawng hrang hrangin hmasawnna eng eng emaw an thlen vek mai. A lehlamah, sorkar ding tawhte leh tuna ding mekte hian sawisel an tâwk vek a, a bik takin eptu party-te phei chuan an sawisel nasa ṭhin viau.

Eptu party-te hi chu sorkar lai party sawiselna tur zawng rêng rênga hmanhlel an ni a; thil nihna dik tak ni chiah lote nen lam ṭan chhana hmanga sorkar sawisel pawh a awm ṭhin àwm e. Chuvangin, political party-te an insawisel hi chu ménah thlak theih a nihna lai a awm a; a pawimawh zawk chu mipui lungawina tâwka hmalak leh hnathawh a ni.

Thil sawi zung zung, a taka a hlawhtlinna hmuh tur awm tak tak leh si lo hi an ngeiawm duh ṭhin. Sorkar hotute pawh hian thil sawi zung zung lo se, an sawi tawh chin erawh a takin tipuitling se; ram leh hnam tan theihtawp chhuah zel se, sawi tamah ni loin, thawh tamah ṭan la rawh se.

Sorkar hmalakna leh hnathawh danah hian mipui duhthusam tak tak thlen theih a ni kher lo ang, mahse, hna thawk ṭha leh ṭha lo chungchangah hian pawm theih chin erawh a awm. Sorkar mek hian mipui duhthusam an thleng lo a nih pawhin, mipuiin thawk ṭha thawkhata an ngaih chin an thleng pha em tih hi an inenfiahna tur a ni.

Political party-te hi ram hmasawnna thlen tura din an ni a, politician-te hi ram rawngbawl tura inpe an ni. Hengte hi party-te leh politician-te'n an hriat reng a ṭul. Tuna sorkar mek party hian thil tih tawhah duhtâwk mai loin, an intiamnate tihlawhtling turin theihtawp chhuah zel teh se.