Dante a nihna ang taka kenkawh

Sorkara lirthei kaihhnawih dan kengkawhtute chuan kum hmasa lama an lo tih tawh ṭhin angin December 1-5, 2025 inkar khan Aizawlah ngaihhnathiam tel loa lirthei endik rûnpui, Zero Tolerance Drive an hmang. Lirthei 2,124 an endik hman zingah dan zâwm kim lo lirthei 474 man a ni.

Zero Tolerance Drive/Checking hi Home department-a hotute thu angin ni 5 chauh kalpui a nih hnuah tihtawp a ni a; kum dang aiin an titawp hma deuh. Tihtawp chhan hi, Krismas inbuatsaih vanglaia lirthei veivâk tibahlah thei zawnga hmalak ṭha tih lohna vang niin a lang.

Ngaihhnathiamna tel loa lirthei endik hi ṭhenkhat chuan ṭul lo an ti mai thei. Nunphung pangngaiah chuan langsar taka traffic rules bawhchhiatna a awm a nih loh chuan lirtheite endik a remchang lo a; mahse, a rûka dan zâwm loa zalen taka chêt velna a awm reng si avangin a bika endik hun siam a ṭul ve bawk.

Zero Tolerance Drive chhunga dan zâwm lo man 474 hi endik zat aṭangin 22.32% a ni. Hei hian Mizote'n lirthei kaihhnawih dan kan ngai pawimawh tâwk lo tih a entir. Mi tam takin lirthei dan ngai pawimawh loh chhan ngaihtuah chian a ngai a, mipuiin ṭha taka dan an zawm theih nan hmalak a ṭul.

Mi tam takin lirthei dan an zawm loh chhan chu dan ngaih pawimawh loh hrim hrim vang a ni ang; dan zawm ṭhatna leh ngai pawimawh tura inzirtirna nasa zawka kalpui a ṭul tihna a ni thei. Dan zawmin hlâwkna tak tak a nei loa ngaihna vanga dan ngaih pawimawh lohna a awm thei a, a bik takin insurance leh pollution chungchangah. Sorkar leh sorkara thuneitute'n dan an zawm ṭhat a ngai bawk.

Lirthei dan zawm loh chhan hrang hrang awm theite hi thuneitute'n uluk taka an ngaihtuah a ngai a; inenfiah a ṭulnaah inenfiah se, kalphung siam rem ngai a awm a nih pawhin siam rem se.

Kan ram hi dan lalna ram a nih theih nan ṭan lak a ngai a, chutiang tur chuan sorkara hotute leh thuneitute'n hma an hruai a ngai. Dante hi a nihna ang taka kenkawh ni se, dan zâwm lote chu dan ang taka hrem zel mai ni se. Mizoram hi dan lalna ram a nih a, dan zâwm lote an chêp phawt chuan mipui hian dan an ngai pawimawh ngei ang.