Mizo ṭhalaite leh hnathawh

Synod Multipurpose Training Centre chuan December 4, 2025 khan an zirlai chhuak turte thlahna, Graduation Day an hmang a, Labour, Employment, Skill Development & Entrepreneurship (LESDE) Minister-in a hmanpui.

SMTC hi Mizoram Synod-in kum 1996-ah a din a ni a; thiamthil chi hrang hrang zirna hmun niin, mi 2,000 chuangi an inzir chhuak tawh. Mizorama kohhran lian berin ṭhalaite hmasawnna tur leh mahni kutkawih eizawnna an neih theihna tura inzirna hmun a din hi a lawmawm. Changtlung zawkin thuam zel se, ṭhalaite pawhin chhawr ṭangkai zel se a duhawm.

Kut themthiamna lam zirna hmun tam zawk Mizoramin a mamawh. Skill training lamah hian sorkar, kohhran leh tlawmngai pawl ten ṭan la zel se, Aizawl chauh ni loin, district hrang hrangah inzirna hmun din belh ni se, Mizoram ṭhalaite tan a ṭangkai hle ang.

SMTC Graduation Day-ah LESDE Minister-in SMTC-a kut themthiam zir zote fuihna thu a sawi a; hna thawhah hlawh tlem aiin hlawh neih loh a zahthlak zawk thu te, ṭhalaite tan hna bul ṭannaah hlawh a sang lo a nih pawhin, taima taka thawh chuan hlawhtlinna a awm thute a sawi.

Mizo ṭhalai zinga tam takte awm dan thlirin, a thim zawnga thlir chuan a beidawnthlak rum rum thei a; chuvangin, LESDE Minister thusawi hi a pawimawh tak zet.

Mizoramah ṭhalai kum tling tawh, mahni zir theih chin zir zo tawh zingah hna thawk lo, sum leh pai thawh chhuah nei lo, chhungte thawh chhuah hmanga khawsa an tam hle. Ṭhalai fuke kim, hrisel ṭha pangngai tan hna thawh loh hi a zahthlak a, eng emaw tal thawh tum ve tur a ni.

Chhungte thawh chhuah ringawta khawsa, mahni mamawh takngial leina tur pawh chhungte dil zel ṭhin ṭhalai nih hi zah nachang hriat a ṭha. Ṭhalaite hian thawh chhuah eng emaw tal neih ve kan tum tur a ni a, kan duhthusam ang hna kan hmu mai lo a nih pawhin a remchang apiang kan thawk ve phawt mai tur a ni.

Thawh hreh nei lo tan chuan Mizoramah hian thawh tur a tam. Minister-in a sawi angin, hlawh tam loh hi a zahthlak loh a, hna thawh loh a zahthlak zawk a; thawh chhuah neih loh ai chuan tam lo deuh pawh hlawh chhuak tura hna thawh a ṭha zawk. Hnathawh hian mihring zahawmna a keng tel a, hna thawk lo mihring chu mi zahawm an ni thei lo tih kan hriat reng a pawimawh.