CD ratio chhia bank-te nawr a ngai
December 4, 2025 khan Aijal Club-ah Mizorama bank hrang hrangte hnathawh thlirletna State Level Bankers Committee for the Quarter Ending September, 2025 neih a ni.
SLBC ṭhutkhawmah hian Chief Minister-in loan pe chhuak ṭha (CD ratio nei ṭha) bank pathum–MRB, SBI leh Apex Bank te a fak a; bank ṭhenkhat, loan pe chhuak tlem leh lutuk, national benchmark pha lo lutukte erawh enliam chi loa a ngaih thu a sawi.
National benchmark-ah chuan bank-te'n sum an dawn (deposit) aṭanga 60% tal mipuiah an pûktir (advance) tura beisei a nia sawi a ni. Chutih laiin, Mizorama bank ṭhenkhat–YES Bank, Bandhan Bank, SSFB, Axis Bank, HDFC Bank, ICICI Bank leh CBI ten loan an pek chhuah (CD ratio) chu 31% a tling lo. Bank pakhat CD ratio phei chu 5.30% chauh a ni a, CM-in insawifiah turin a hriattir nghe nghe.
Bank ṭhenkhatin sum an hmuhte ṭha takin Mizoram mipui tan loan angin an pe lêt a, an CD ratio pawh a ṭha thawkhat hle. Chutih laia bank ṭhenkhatte Mizoram tan an insêngso ve duh mang miah lo hi a ngeiawm a, a thinrimthlak, Mizoram leh mipui hi engahmah an ngai loah a ngai theih hial a ni.
Mizorama bank, a bikin private bank zinga ṭhenkhat hi chuan Mizoram mipui hi an hlâwkna atan chiah an duh a, Mizoram leh a chhunga chengte tana insenso let hi an tum miah lo em ni chu aw a tih theih.
Sorkar thuneitute hian Mizorama bank-te hi uluk zawka vilin, advance an pek dan ṭha takin vil se. Ṭawngkaa hauh ringawt hi chuan awmzia a nei thui lo niin a lang a, loan pe ṭha duh lo bank-te lakah huaisen takin action la zel tawh se awmzia a nei hle ang. CD ratio nei chhe lutuk bank-te hi thuneitute'n na zawka an nawr a ngai a ni.
Company hrang hrangte hian hlâwkna an hmuhte chu mipui vantlang tana thil ṭha tih nan an hmang tur a ni a, corporate social responsibility tan sum an sêng tur a ni a, hetah hian bank-te pawh an tel. Mizorama bank ṭhenkhat chuan CSR fund hmangin vantlang tan thil ṭha tak tak an ti ṭhin. Chutih laiin, CSR hmang ngai miah lo leh hmang ṭha duh lo an awm bawk a, chungte chu thuneitute'n an nawr a ṭul bawk.