Sawhthing lei leh turah inhmakhua ni se

Mizoram sorkar chuan Mizorama sawhthing tharte a leina man chu a pe kim tawh niin Agriculture Minister-in a sawi. Minister sawi danin, kuminah sorkarin Mizorama kut hnathawktute thar sawhthing quintal 3,38,351.82 (kg. 3,38,35,182) a lei a, sawhthing leina atan cheng vbc 137.72 a sêng.

Kuminah sawhthing man pek kim theih a ni lawk lo a, sawhthing thartte an khawngaihthlak hle. A man pek kim a nih mai loh chhan hi sawhthing hralhtute zingah thil dik lo ti, Myanmar aṭanga sawhthing lak luh hralh tel an awm vanga sawi a ni a; a zialo hle. Tunah sorkarin sawhthing man a pe chhuak kim ta hi a lawmawm a, sawhthing thartute pawh an lawm hle ngei ang.

Sawhthing hralh leh leiah neuh neuh a awm a, sawhthing thartute zingah lungawi tâwk lote pawh an awmin a rinawm. Lungawi lohna neite'n vuivaina an thlen theihna tur sorkarin a buatsaih a, a lawmawm. Lungawi tâwk lohna nei an awm a nih chuan inthlahrung loa thlen ni se, chung aṭang chuan sorkar lam pawhin inzirna tur leh hmasawnna tur an hmu thei dawn a ni.

Mizoram sorkar chuan thlai chi li lei tura intiamin, flagship programme-ah a nei a; chu'ng zingah chuan sawhthing hi a pui ber, kut hnathawktute'n an uar ber leh thar tam ber a ni. Sorkarin thlai a lei dan hi duhthusam a ni vek lo a, a bikin sawhthing leh hmuhphiah lei danah sawi neuh neuh a awm a; opposition party chuan sawisel tur an zawng reng a ni.

Sorkarin kumina sawhthing a lei dan leh a man a pek dana felfai tâwk lote hi sawisel theih tak a nih rualin, a vawi khatna a nih avangin hriatthiam theih chin a awm. Thil rêng rêng hi a bul ṭannaah chuan felfai tâwk lo leh harsatna neuh neuh a awm ṭhin a, chu'ngte chu hriatthiam a ngai ṭhin.

Sawhthing hralh leh lei danah harsatna awm theite kut hnathawktute leh mipuiin an hriatthiampui a ṭul a; sorkar lam pawhin insiamṭhatna lai an hmuh thiam a, an insiamṭhat a ṭul ve bawk.

Nakkum 2026-ah pawh sorkarin February thla aṭangin sawhthing lei ṭan leh dawn. Kumina tawnhriat aṭanga inzirin, sawhthing lei leh turah hi chuan tluang zawka sawhthing lei a nih theih nan sorkarin hma a la tur a ni a, tun aṭanga inhmakhuain inbuatsaih rawh se.