Special allowance tihtawp a ṭha lo'm ni

RTI Act hmanga zawhna Finance department-in an chhàn danin, sorkar laipuiin all India service officer-te special allowance a pek ṭhin chu September 23, 2022-ah a tihtawp tawh. Chutih laiin, Mizoram sorkar chuan a la pe chhunzawm zel a, chuta tan chuan sum tam tak hman a ni ṭhin.

Finance department tarlan danin, all India service-te special allowance hi sorkar laipuiin a tihtawp hnuah Mizoram sorkar pawhin November 3, 2022-ah tihtawpna order (a ṭul anga hma la tura hriattirna) Account & Treasury-ah a pe ve nghal. Mahse, Mizoram sorkar chuan titawp hlen ta mai loin, February 22, 2023 aṭangin special allowance a pe leh a, retrospective date atan September 23, 2022 hman a ni.

All India service officer-te tana Mizoram sorkarin special allowance pek zat chu basic pay aṭanga 20% a ni a, July 25, 2017 hma lama mite phei chu basic pay aṭanga 25% pek an ni. Mizoramah all India service officer special allowance la mi 83 an awm mek a; chu'ng mite'n October 2025 thlaa an lak zat chu Rs 23,68,620 a ni a, kum khatah chuan Rs 2,84,23,440 a tling.

Mizoram pachhiatzia te, sorkar sum dinhmun ṭhat tâwk lohziate sawi a ni ṭhin a, kan hre tlang. Chutih laia sorkar laipui pawhin a tihtawp tawh special allowance, India rama state rethei ber zinga miin a la pe chhunzawm tlat hi a mak a, thil àwm lo takah a ngaih theih.

Sorkar laipui pawhin titawpa a pek tawh loh special allowance Mizoram sorkarin a la pek avanga kum khata sum a sên zat hi cheng nuai 284.23 a ni a; Mizoram ang state rethei tan chuan a tam tham a, uiawm tham hle.

All India service officer-te tana special allowance pek chungchangah hian Mizoram sorkarin ngaihtuahna thar sêng se a ṭha hle ang. A ṭul angin India rama state dangte'n an kalpui dan pawh zir chiang se. State dangte'n special allowance an pe tawh lo a nih phei chuan huaisen takin tihtawp ni rawh se.

State dangte'n special allowance an lo la pe a nih pawhin, Mizoram ai ngawt chuan an state a hausa zawkin a rinawm a, ṭhenkhat phei chu state hausa tak takte pawh an ni thei; chuvang chuan, Mizoram nen khaikhin chi pawh an ni kher lo ang.