Krismas puala kâwn chei

Aizawl Municipal Corporation chuan kumin Krismas puala kâwn cheiah lawmman an siam dawn tih November 4, 2025 khan an puang a, lawmman zat tur an tichhuak nghal.

Kâwn chei mawite hnena lawmman pek dan tura AMC-in an ruahman chu - pakhatna Rs 2,00,000, pahnihna Rs 1,50,000 leh pathumna Rs 1,00,000 a ni a; chei mawi zual dang pasarih hnenah consolation prize Rs 50,000 pek an tum bawk. Lawmmana sum sen tur zat hi a vaiin Rs 8,00,000 a ni.

AMC hi Aizawl khawpui enkawltu a ni a, Aizawl khawpui chei mawina atana veng hrang hrangte hmalakna ngaihlua lawmman an pe tur hi a lawmawm a, kâwn cheitute a tiphûr lehzual ngeiin a rinawm.

Kâwn chei hi a hautak em em a, sum tam tak hman a ni ṭhin. Kâwn cheina atan kawng hrang hrangin sum an tuak ṭhin a, an thawk rim hle ṭhin. Mahni veng chhungah thawhlawmte an khawn ṭhin bawk. Hengte avang hian AMC-in lawmman a siam hi a lawmawm a, senso nasa taka phuhrutu a ni ang.

Kumina kâwn chei tum zinga a tam ber chu AMC-in lawmman an siam dawn vanga chei an ni loin a rinawm a; chutih rualin, lawmman an pek dawn vanga chei an awm a nih pawhin a ṭha tho.

AMC-in lawmman an pek tur zat hi ṭhenkhat chuan tlem an ti mai thei a, hmun ṭhenkhatah chuan kâwn cheina senso a phuhru lo nasa hle pawhin a rinawm. AMC-in lawmman an pek tur hi kâwn cheitute senso phuhrûkna tura an tih a ni lo tih hi rilru-ah vawng reng ila a ṭha awm e.

Krismas puala kâwn chei kan nih ṭhin angin, mihringte chhandamtu chawimawina leh a lian champha lawmna hi rilruah lian ber se. Kâwn kan chei mawi avanga AMC-in lawmman min pe a nih chuan lawm takin dawng ila, lawmman min pe lo a nih pawhin vui lo ila a ṭha hle ang.

Kâwn chei a nih hian hmun tam takah chuan zan lamah a mawi viau a, chhun lamah erawh a chul rup thung a, ṭhenkhat phei chu chhun lamah veng tiṭawptu a nihna lai pawh a awm thei. Chuvangin, kâwn cheiah hian zan lama mawi chauh ni loin, chhun lama mawi tel tur záwnga chei ni thei se a duhawm.