Ruihhlo do beihpui thlâk thlâwp ila

Mizoram sorkar leh Central YMA ṭang dun chuan September 1, 2025 aṭangin Mizoram pum huapin ruihhlo do beihpui an thlak a, a hmingah Operation Against Trafficking and Use of Drugs and Narcotics tih a ni.

Excise & Narcotics Minister sawi danin, beihpui thlâknaah hian Myanmar aṭanga ruihhlo lo lut tur dan chah tum a ni. Ramri chhehvel khaw hrang hrangah police dah belh a ni a, operation neih a ni ṭhin.

Ruihhlo do beihpui thlâk chungchangah Mizoram Police chuan tun hnai khan thuchhuah an siam a; beihpui thlakin awmzia a neih thu tarlangin, "Beihpui thlâk a nih hnu hian Mizoram pumah ruihhlo veivâk a tlahniam nasa hlein hriat a ni. Ramri kâna mihring leh lirthei veivâk a tlem a, nasa takin ruihhlo lo lut a tlem phah... Tualchhunga ruihhlo an man zat a tlahniam," an ti.

Excise & Narcotics Department pawhin September 12 khan thuchhuah an siam a, "He hmalaknaah hian YMA, khawtlang hruaitute leh mipuite’n theihtawpa an thawhpuina chuan rah duhawm a chhuah mek," an ti bawk.

Sorkar leh YMA ṭangruala ruihhlo do beihpui thlak a ni hi a lawmawm. Hmalaknain rah ṭha a chhuah hmuh nghal tur a awm te, Myanmar aṭanga ruihhlo rawn lut leh tualchhunga ruihhlo veivâk a tlakhniam phahte hi a lawmawm tak zet.

Home Minister sawi danin, ruihhlo do beihpui thlak hi thla 4 awh a ni phawt dawn a, kumin 2025 chhung zawng tihna a ni. Beihpui thlak aṭanga ni sawm emaw lek chhungin awmzia a nei nghal hle a nih chuan, Mizo ṭhalai tam tak, ruihhlo la ti ve lote ruihhlo laka vênna ṭha tak a ni dawn a, ruihhlo ti tawhte chhan chhuahna atana hmalakna awmze nei tak a ni ngei dawnin a lang.

Ruihhlo do hian tha thlah a ngaitheilo hle mai a, thâ thlah loa ṭan zel a ngai dawn. Sorkar leh YMA-te hian thla 4 chhung beihpui an thlâk piah lamah pawh beihpui an thlâk chhunzawm zel se, lungrual takin ruihhlo han do zel teh se.

Sorkar leh YMA ten beihpui an thlak mek hi kohhran te, pawl dangte leh mipuite'n theihtawpin thlâwp ila, puih theihna kan neihna lai apiangah i pui ṭhin ang u. Kan ṭan rual tlat chuan kan rama ruihhlo hluar lutuk a tlahniam zel ang a, ruihhlo lakah Mizoram ṭhalaite kan vengin kan chhan chhuak thei ngei ang.