Court thupeka PWD pisa kalh

Serkhan-Bagha Road kawng laihnaa ram lakah Mizoram sorkar (PWD)-in zangnadawmna an pek theih loh avangin Kolasib Fast Track Court thupek angin PWD, Kolasib Division Office chu September 11, 2025 khan kalhsak a ni.

Court Order-a a lan danin, Mizoram PWD-in kum 2013/2014 vel khan Serkhan-Bagha kawng an zauh a, kawng zauhna atana mimal ram lakah mi 62 hnena zangndawmna pek tura chhût chhuah cheng nuai 342.25 lai chu Court-in pe tura ṭum hnih thupek a chhuah hnuah pawh pek a la ni lo.

PWD-in court thupek an zawm loh avangin Court chuan Kolasib-a PWD pisa chu kalh turin thupek a chhuah ta a; PWD lirthei leh JCB leh khawl lian dangte a hrènsak bawk.

Mizoramah hmasawnna hna thawh a nih hian zangnadawmna hi hna tikhawmuangtu leh harsatna thlentu a ni tawh ṭhin a, buaina neuh neuh a awm fo. Serkhan-Bagha kawng siamnaah pawh zangnadawmna bawk hi tute emaw harsatna leh mualphona thlentu a ni leh ta a, a zialo hle.

India ramah hian dan hmanga rorelna hi a pawimawh em em a, court thupek zawm duh loh phei chu a pawi a, court thupek zawm a nih loh zel phei chuan harsatna lian tak a thleng thei.

Sorkarin court thupek a zawm loh chhan hriat mai theih a ni lo a, pek duh loh vang emaw, pek tum loh vang emaw, khawi emaw laiah inthlahdah vang emaw a ni thei. Harsatna lian tak sorkarin a tawh vang a ni thei bawk.

Sorkarin court thupek a tihpuitlin theih loh chhan chu eng pawh ni se, sorkar tan mualphona lian tak a ni. Chuvangin, sorkarin harsatna a tawh belhchhah zel loh nan court thupek a tihhlawhtlin thuai a ṭul a; chumi tur chuan zangnadawmna a pek vat a ngai tihna a ni.

Zangnadawmna pek tura tihte'n an dil leh phût danah eng emaw a awm a ni thei a; mahse, court a thleng a, court-in thutlukna a siam tawh. Sorkar lamah hmin zân lohna a awm a nih pawhin, court thupek tihpuitlin phawt mai a ṭha berin a rinawm.

PWD pisa kalh leh an lirthei leh bungrua eng emaw zat hrên a nih avang hian sorkar, a bik takin PWD-in harsatna an tâwk ngeiin a rinawm. Sorkar/PWD anga harsatna chuan mipui pawh a nghawng thei ngei ang. Chuvangin, sorkarin hma a lak vat a ngai a, sorkar aiawha mawhphurtu PWD hotute'n court thupek vanga harsatna an tawh hi chingfel turin chak takin han bawhzui teh se.