Mahni venga ngawlveite vei ila

Armed Veng khawtlang ṭangrual–kohhran, local council, tlawmngai pawl leh mipui ṭangrual chuan an veng chhunga ruihhlo ngaite chhan chhuahna atan camping an buatsaih mek a, thla khat chuang awh tur a ni.

Armed Venga kohhran pawl hrang hrang leh an hnuaia pêng hrang hrang te, tlawmngai pawl te, bialtu MLA leh corporator thlengin an ṭangrual a, sum leh pai, thâ leh zung an thawh khawm. Mahni insêngsoa an venga ruihhlo ngaite chhan chhuak tura an pên chhuak hi a lawmawm a, thil ṭha tak a ni. An ṭanrualna hian rah ṭha a chhuah ngei a beiseiawm.

Hetianga veng chhung mipuite'n an veng mi, ruihhlo vanga harsatna tâwkte chhan chhuak tura hma an lakna hi veng dang tan entawn tlak a ni a, khua/veng dangte'n ti ve thei ila a ṭha hle mai.

Khua leh veng tinah hian ruih theih thil eng emaw ber ti an awm vekin a rinawm. Khawpuiah damdawi ruihhlo (narcotic drug) ngawl vei an tam a; thingtlang lamah pawh eng emaw zat a awm a, chutih rualin, awm miah lohna khua pawh eng emaw zat an awm àwm e.

Mizoramah ruihhlo a hluar a, ruihhlo ngai pawh an pung viaua sawi a ni ṭhin. Hetih lai hian, khawpuiah hian ruihhlo ngai hi veng tinah chhiar ta ila, an tam lêm lo; veng mipui zat aṭanga chhût phei chuan tlemtê an nih a rinawm.

Ruihhlo ngawlvei an tamzia te, ruihhlo ngaite chhan chhuah ṭulziate kan sawi ṭhin a, kan vei tlang. Mahse, a tak taka che chhuaka hma la erawh mi tlemtê an ni a; hma latu ṭhenkhat chuan nasa taka sawisel an tâwk zui bawk.

Khua leh veng tinah ruihhlo ti ṭhinte hi mi tam an nih si loh chuan, khua/veng tin hian khawtlang angin hma la ṭheuh ila; kan ṭan rual chuan chhan chhuah hna ṭha tak kan thawk thei a ni.

Kohhran, pawl leh mipui hian mahni veng ṭheuha mite hi vei ila, an tan theihtawp chhuah ila, ruihhlo vanga harsatnate hi eng emaw chen chu a ziaawm thei ang. VC/LC te, kohhrante leh tlawmngai pawlte'n hma an lâk a ngai a, khawtlang mipuiin an thlâwp ṭhat a ṭul bawk.