CSS hnuaia thawkte thil phût
All Mizoram CSS Employee Coordination Committee (AMCECC) rorel angin centrally sponsored scheme (CSS) hnuaia Mizoram sorkara thawkte sorkar lakah an nuar mek; September 9, 2025 khan mass casual leave an la ṭan a, niminah chhunzawmin, vawiinah pawh chawlh leh an tum.
CSS hnuaia thawkte hian Regularization of CSS Employees Scheme, 2024 a taka hman leh Health department hnuaia provisional employee health worker mi 31-te CSS scheme hmanga sorkarin tun hnaia a dah ngheh chu sût leh an phût a ni. AMCECC hian tuna an hmalakna zâwm lote chu Regularisation of CSS Employees Scheme, 2024 hman tum ve lo turin CSS hnuaia thawkte an hriattir.
Heng aṭang hian AMCECC hi an ṭang na hle niin a lang a; an thil phût hi sorkarin tihlawhtling mai lo se, engtin nge an kal zel dawn tih erawh hriat theih a la ni lo.
Mizoram sorkar hnuaia hna thawk zingah CSS hnuaia thawk an ṭhahnem viau a, mi 15,000 vel an nia sawi a ni. Heti zat hi an chawlh chuan sorkar hnain a tuar lo thei lo ang tih a chiang.
Department ṭhenkhat chu CSS hnuaia thawkte-ah nasa takin an innghat tawh a, a bikin Health department leh Education department-a CSS hnuaia thawk an tam zual. Heng department-te hi mipui hne hnâi, chhungkaw tinin kan mamawh a nih bawk si avangin sorkar hian harsatna chingfel turin chak taka hma a lak a ngai a ni.
CSS hnuaia thawkte thil phût hi an dinhmuna inchanin phût awm tak a ni. An zinga tam tak chu sorkara ngheh beisei vanga hlawh tam lo tak chung pawha thawk ṭâng ṭâng an ni ang a, kum 20 chuangte thawk tawhte an ni a, tuna sorkar an kar pawh hi ṭhenkhat tan chuan a àwm em em. Chutih rualin, CSS hnuaia thawkte dah ngheh vek theih an ni lo ang.
Mizoram sorkar hian Regularization of CSS Employees Scheme hi fimkhur taka a hman a ṭul tawhin a lang; CSS hnuaia thawk zinga dan ang taka lak, dah ngheh àwm leh phûte chu a remchan anga dah ngheh a hun tawh a ni.
Tun hma aṭang tawhin CSS-ah dan loa lak, duhsak zawngte thun mai ang chi an tam nia sawi a ni ṭhin. Dan ang taka lak leh dan loa lak an awm ngeiin a rinawm a; chu'ng mite chu sorkar hian zir chiangin, huaisen takin thliar mai se a ṭhain a rinawm.