AAI leh Lengpui Airport tihchangtlun

Mizoram Chief Minister chu September 4, 2025 khan Arunachal Pradesh-a Ministry of Civil Aviation-in a buatsaih North East Region Minister’s Conference on Civil Aviation-ah a tel a; Lengpui Airport mi dang hnena hlan chungchangah Airport Authority of India (AAI)-in rawtna an thlen hun Mizoram sorkarin a nghah mek thu a sawi.

CM hian Lengpui Airport enkawl zel dan tur chungchangah hian Indian Air Force (IAF)-in rawtna an neihte Mizoram sorkaran an thlen tawh a; AAI lamin rawtna an la thlen ve lo tih a sawi a ni.

Hetih lai hian, AAI Chairman chuan Lengpui Airport chungchang chu Ministry of Home Affairs leh Ministry of Civil Aviation ten an bawhzui mek a, tun September thla laihâwlah AAI-in rawtna an thlen theih tur thu Mizoram CM a hrilh tih tarlan a ni.

Sum leh paia pachhia Mizoram sorkar tan ṭha tak leh changtlung taka Lengpui Airport enkawl reng a harsa a, sorkarin mi dang enkawltir tumin hma a la a, zir chiangtu tur committee pawh a din a ni. AAI lamah harsatna a awm avangin IAF enkawltir tuma hmalakna pawh a awma hriat a ni a, IAF enkawltir erawh pawl hrang hrangin an duh loh thu an puang.

AAI-in Lengpui Airport an enkawla an tihchangtlun theih nan Mizoram CM-in March 15, 2025 khan Union Home Minister a sawipui a; Home Minister hian AAI-in thla thum chhungin ruahmanna an siam ang a, thla ruk chhungin Airport tihchangtlun hna AAI-in an thawh nghal tur thu a lo hrilh.

Union Home Minister-in AAI-in ruahmanna an siam hun tur a sawi hi a liam daih tawh a, mahse, tun thlengin AAI lamin ruahmanna an siamte Mizoram sorkarah an la hriattir lo. Lengpui Airport tihchangtlun hna thawh ṭan hun tur a sawi pawh a liam ṭêp tawh.

Home Minister sawi hi AAI lamin an bawhzui ṭha tâwk lo a ni thei a, Mizoram sorkar pawhin tih tur a neiin a rinawm a, tih tur a neih chu a bawhzui ṭha lo a ni thei bawk.

Lengpui Airport tihchangtlun dan tur ruahmanna AAI-in an thehluh thuai theih nan Mizoram sorkarin chak takin bawhzui se. Union Home Minister meuhin a sawi tawh a; a ṭul a nih chuan Home Minister emaw, Civil Aviation-ah leh AAI-ah pawh chak takin ûm zui se a ṭha hle ang.