Bawlhhlawh tawih thei lo thehthang

Durtlang North Local Council hnuaia Local Health Sanitation Committee chuan an veng chhung a fai a, a thianghlim zawk theih nan kumin August tir lam khan an veng chhunga plastic kaihhnawih bawlhhlawh paih tawhte an lei a, tum hnih an lei tawha sawi a ni.

Durtlang North hi AMC-ah ward-1 chhunga mi a ni a, ward-1 chhunga mi vêk Selesih leh Muanna Vengah pawh plastic ûm lei hi an ti tan ve leh tawh bawk.

AMC ward-1 chhunga veng thenkhatin an veng chhung a faia a thianghlim zawk theih nan leh, plastic ûmte mumal zawka thehthang a nih theihna tura hma an la hi a lawmawm a, rah tha tak a chhuah ngei a ang. Thil tha, intihhmuh chi tak a ni. Veng dang thenkhatah pawh ti ve tum an awm nuala sawi a ni a; la ti ve lo leh ngaihtuahna la seng ve lote pawhin ti ve zel thei se a duhawm.

Kum eng emaw ti kal ta atang khan Mizoramah khawpui fai inelna kalpui a lo ni tawh a, kuminah pawh kalpui leh a ni dawn. Tunlai hian Aizawl leh a chhehvela YMA branch-te veng fai inelna kalpui mek a ni bawk.

Faina inelnaahte hian, Mizoramah chauh ni loin, India ram pumah, hmuh theiha faina leh thianghlimna a pawimawh em em rualin, bawlhhlawh tawih thei leh tawih thei lo mumal taka thliar hi ngaih pawimawh ber zinga mi a ni zel a; tawih thei lo, plastic lam chi hman tlem emaw, hman loh emaw a langsar bawk thin.

Faina leh thianghlimna atan hian naupangte hi an pawimawh em em a, kan ram, kan khawtlang a fai zel theih nan naupangte rilruah faina leh thianghlimna te, bawlhhlawh paih mai mai loh chìn thana neihte nghet taka tuh a pawimawh em em.

Veng thenkhata plastic ûm chhar khawm leh hralh pawh hi naupangin an ti deuh ber. Miin an paih tawhte a thlawn ngawta chhar khawm lo a, pawisa tlem azawng an lo hlawh ve theihna remchang siam a ni hian anmahni-ah phûrna a siam ngeiin a rinawm. Chu chu faina, thianghlimna leh plastic lam chi that lohzia zirtirna tha tak a ni nghal bawk.

Khawvel changkang zelah tawih thei lo–plastic lam chi hman tam loh hi inzirtir uar zel a ni a, Mizoramah pawh kan inzirtir uar tial tial. Aizawl leh hmun thenkhatah chuan hman khat daih sarâng khap mek a ni.

Plastic leh sarâng te hi thil tam takah a tangkai em em a, mihring khawsaknaah awlsamna thlentu a ni ngei mai. Mahse, kan hma lam hun thlirin, plastic lam chi hman tam hian harsatna min la thlen thei a ni tih kan pawm a ngai; hman loh tawp a harsa a nih pawhin, hman tam loh tual tial tum ila a tha hle ang.