NIRF Ranking leh Mizorama college-te

Ministry of Education hnuaia National Institutional Ranking Framework chuan India rama zirna in (higher institution) ṭha a thlan result September 4, 2025-ah a tichhuak. Mizoram University chu university ṭha 82-na a ni a, Pachhunga University College chu college ṭha 49-na niin, Zirtiri Residential Science College chu 201-na leh 300-na inkarah a awm.

NIRF Ranking-ah Mizorama kan zirna-in sang pathum an tel hi a lawmawm a, rank sang tak an nei hi a lawmawm zual. MZU hi hmarchhak state-ah university ṭha ber pathumna a ni a; PUC chu hmarchhak biaka college zinga a ṭha ber a ni a, Zirtiri RSC pawh a ṭha berte zinga mi a ni bawk.

India rama college 50,000 chuang zingah NIRF 2025-ah college 4,030 chauh an tel a, tel lo an tam hle. Mizorama college zingah pawh pahnih chiah an tel a, tel lo an tam viau. MZU hi hun eng emaw chen an tel tawh a, PUC pawh vawi 4/5 emawah an tel tawh a, Zirtiri RSC chu a vawi khatna atan an tel; college dang zawng chu an la tel lo.

Hmarchhak state bika college tel zat chu - Assam aṭangin 149, Manipur aṭangin 30, Tripura aṭangin 19 , Nagaland aṭangin 11 , Meghalaya aṭangin 9 leh Arunachal Pradesh aṭangin 4 a ni a; Mizoram aṭanga tel zat a hniam fâl.

NIRF Ranking-ah hian higher institution zingah tel phalsak bik emaw, phal loh bik emaw a awm lo a, a duh tan tel theih a ni. Mizorama college tam zawkte tel loh chhan hriat a ni lo a, an peih loh vang emaw, ṭul tih loh vang emaw, tel tura tih ngaite tih peih loh vang emaw a ni thei.

Institution ṭha tehna a nih miah avangin Mizorama college-te hian tun hnuah chuan NIRF Ranking-ah tel ve ṭhin tum tawh se. College tênau deuh tan chuan a harsain a rinawm a; college lian deuhte hi chu an tel thei em em ang, tel turin rilru siam se a duhawm.

NIRF Ranking-a tel hi ṭanna petu a ni thei a, ṭanna chuan hmasawnna a keng tel. Tel tur chuan taimak a ngai a, tuna an tih mekte piah lamah thil eng eng emaw tih a ngai ang, chungte chu huam ve a ngai ang. Hmasawn tumna rilru neih a ngai a, mi dangte elna thinlung neih a ṭul; taimâk a ngai ang a, ṭan lehzual a ṭul bawk ang.