VVIP-te dinhmun hriat a pawimawh

India rama thuneihna sang ber neitu Prime Minister-in September 13, 2025-ah Aizawl rawn tlawh a tum a, Bairabi-Sairang inkara rel kawng siam thar a hawng dawna sawi a ni. PM rawn zin turah hian nasa taka inbuatsaih mek a ni a, mi tam takin an buaipui mek.

Prime Minister rawn zin tur avangin Aizawl District Magistrate-in thupek a tichhuak a, Aizawl district pumah drone/aerial camera emaw, chutiang lam chi reng reng thlawhtir leh hman khap a nih thu a puang. Aizawl Traffic SP pawhin PM-in lirtheia a paltlang tur kawngpui dungah lirthei, bungrua leh thil dang rêng rêng dah phal a nih loh thu leh, darkar 2/3 chhung kawngpui khâr a ngaih theih thu a tarlang.

PM rawn zin tur avanga nasa taka inbuatsaih a ni te, thuneitute'n khapna thupek an chhuah te, hun eng emaw chen lirthei tlante tihdin a ni ṭhinte hi mipuiin kan hriatthiam a ngai.

Tuna PM hi India rama venhimna sang ber leh khauh ber, SPG pek a ni a, venhimna atana kum khata sum hman tura ruahman pawh cheng vbc. 600 vel a ni. Chuvangin, PM rawn zin turah hian kawng hrang hrangin nasa taka inbuatsaih loh theih a ni lo.

VVIP avanga sorkar inbuatsaihnate leh hmalaknate hi Mizo tam tak chuan kan hrethiam lo fo. Ram hruaitute pawimawhzia, a bik takin venhimna lama khauh a ngaihzia kan la hriat tâwk loh vang a ni ang.

Ram hruaitu pawimawh, sorkar laipui leh state sorkara hotu liante hian an nihnain ken tel an nei a ni tih mipuiin kan hriat a ṭha. An nihnain a ken telte hi dan hnuaia mi a ni a, dan ang taka an chanvote chu an neih a ngai. Hamṭhatnaah a ni emaw, venhimna lamah a ni emaw, anmahni mimal duh dan ang ngawtin an awm thei lo a, danin a sawi anga pek ngai thil tam tak a awm a ni tih mipuiin kan hriat a ṭul.

PM rawn zin tur vanga Aizawla khawlai leh kawngpui kam tihfaite pawh mi ṭhenkhatin an sawisel a, an nuihzat deuh niin a lang. India ram security category-a awm pha miah lote punkhawmna tur inkhawmpui velah pawh faina leh thil dangah nasa taka kan inbuatsaih a, kan hnatlang mup mup ṭhin a; India rama thuneihna sang ber leh venhimna khauh ber nei rawn zin turah kawng tinrênga theihtawp chhuaha inbuatsaih hi tih âwm tak a ni.