Zirtirtute hlutna leh zahawmna

Vawiin September 5 hi Teachers' Day (Zirtirtute Ni) a ni. Zirtirtute chibai u.

Teacher's Day a lo thlen hian zirtirtute hlutzia kan hre chhuak ṭhin a, hun dangah erawh kan hre reng lo fo. Zirtirtute pawimawhzia kan hriat reng loh fo karah an hlutzia kan hriat thar lehna ni a nih ṭhin avangin Teachers' Day hman a ni ṭhin hi a ṭha em em.

Mihringte hi kan zir thlen chin chu eng pawh ni se, zirtirtute zirtir chhuah kan ni deuh vek mai. Eng anga hausa, ropui leh lal pawh ni ila, zirtirtute zirtir chhuah kan nih vek avangin zirtirtute hi kan zah tur a ni. Kan zirtirtute kha tunah keini aia thiam lo zawk, rethei zawk, lal lo zawk pawh ni se, anni zara tun dinhmun ṭheuh thleng thei kan ni a, kan zahin kan chawimawi thiam zel a pawimawh.

Zirtirtute pawhin an pawimawhzia an hriat thar a ṭul. Zirtirtute pawimawhzia te, hnam lungphùm phúmtu an nih thu te, zah thiam an ṭul thute kan sawi lai hian, anni pawhin an pawimawhzia an hriat a, zah tlâka zirtir hna an thawh a ngai. Zirtirtu hna hi hna zahawm a ni, kan tih ṭhin rual hian, zirtirtu hna thawh vang ngawtin mi zahawm a nih ngawt theih loh.

Zirlaite thiamna pek mai bakah, a ṭha zawng leh chhe zawnga zirlaite nun kaihruai theitu an nih avangin zirtirtute hian an nun an uluk reng a ngai a, zirlaite entawn tlaka an nun a ṭul. Inpekna thûk zawk nen ṭhahnemngai takin thawk zel se ram leh hnam tan an hlu zual zel ang.

Hlawh lakna leh eizawnna rilru pu ringawta zirtirtu hna thawh chi a ni lo a, mihring nun chhertu, hna ropui leh zahawm a ni tih hre reng chungin zirtir hna hi taima taka thawh a ngai. Hei hi zirtirtu zawng zawngin an hriat a pawimawh a, theihtawp han chhuah zel teh se.

Zirtirtute chhawrtu–sorkar, kohhran, pawl leh mimalte pawhin zirtirtute pawimawhna an hriat reng a ngai; hlawh inbatsak mai mai te hian zirtirtuteah inthlahdahna a siam thei tih hriat a ṭha. Zirna ṭha nei tur leh zirtirtu ṭha nei turin a chhawrtuin a enkawl dan a pawimawh hle a ni tih hre reng a ngai a ni.