Sawhthing man pek vat ni se

Tun hnaia ni hnih awh Assembly session-ah Agriculture Minister-in kumin 2025-a sorkarin sawhthing a lei zat chu quintal 3,45,932 a nih thu te, sawhthing leina atan cheng nuai 95.63 pek chhuah a nih tawh laiin, la pek loh cheng vbc. 45 vel a la awm thute a sawi.

Agriculture Minister hian sawhthing man sorkarin a la bat chhan sawi nghalin, Myanmar aṭangin sawhthing lak luh hralh tel an awm vang te, sorkar laipuiah market intervention scheme (MIS) an dil vang leh MIS hmuh a nih chuan bank account-te thlak a ngaih vangte a nih thu a sawi a ni.

Chief Minister-in sawhthing leina la pek kim loh chhan chu sum neih loh vang a nih loh thu te, pawisa dawngtu lamah buai a awm vanga la pe chhuak kim thei lo an nih thute a sawi ve bawk.

Mizoram sorkarin sawhthing a lei hi a lawmawm a, sawhthing lei tura sorkar sum tam tak hman huama hmalak a nite hi a lawmawm a; kut hnathawktute'n an thawhrim rah an hmuh phah a ni. A thlawna sum dawng tawp lo a, loneitute'n thawhrimna nena sum tam tak an thawk chhuak hi a lawmawm.

Sawhthing leina atana sorkar sum hman hi a tam tham a, mi ṭhenkhat tan chuan ngaimawh theih pawh a ni mai thei. Mahse, tun hmaa sorkar flagship programme eng eng emaw hmanga pawisa tam tak lo sem tawh ṭhinte ai chuan a la tam lo zawkin a lang.

Hetih lai hian, sawhthing thartu tam takin an sawhthing hralhna man an la hmu thei lo hi a zialo a, an khawngaihthlak hle; sawhthing man dawn an nghakhlel hle ngei ang.

Sawhthing man la pek loh cheng nuai 4,500 vel a nih avangin sawhthing man la dawng lo an tam hle ang tih a rin theih a; sawhthing man an dawn a, an thawhrim rah an hmuh vat theih nan sorkarin chak zawkin hma la rawh se.

Sorkar hotute'n sawhthing man la pek kim loh chhan an sawi hi chinfel harsa tak a ni ang em tih ngaihtuah theih tak a ni. Myanmar-a thar lak luh a, Mizoram sorkar ruahmanna hmuna hralh an lo awm a nih pawhin, chung mite vanga Mizoram hmun dang daiha mi sawhthing thartute tihkhawmuan ve an nih chuan a fel lo a, thuneitute'n rang zawka an chinfel a ngai a ni.