PSU-ah ngaihtuahna thar hman a ṭul

Mizoram Legislative Assembly-a Committee on Public Undertakings (COPU) chuan state sorkara public sector undertaking pali chungchang an zirchianna report August 27, 2025 khan Assembly House-ah an pe lut a, rawtna hrang hrang an neihte an tarlang.

Mizorama PSU-te hi tun hma aṭang tawhin state sorkar tan phurrita ngaih a ni ṭhin a, an sum deuh chhuah aiin sum hman a tam zawk ṭhin vang a ni. Hei vang hian kum 10 liam ta vel khan sorkarin PSU ṭhenkhat chu tihtawp a tum tawh a, thawktute ṭhenkhat state sorkarah lutin, ṭhenkhat pension-in an chhuak. Sorkar hmasa hun aṭangin tharthawh leh a ni.

COPU rawtna langsar tak chu - PSU-a chairman leh managing director-te political ground-a ruat tawh loh a ni. Hei hi tihpuitlin mai theih a nih rualin, tih mai awlsam lo tak a ni thei bawk. A chhan chu tun hma aṭang tawhin sorkar lai party-in an party-a hruaitu pawimawh, MLA leh MLA ni lote pawh chairman-ah an dahna ṭhin vang a ni.

PSU chairman atana MLA emaw, party-a hruaitu pawimawhte dah an ni ṭhin hi a hriatthiam theih viau. Chutih rualin, PSU hmalakna leh hnathawh lam hawia tui lo dah an nih chuan titlachhetu an nih theih avangin, politics thil deuha chairman inruat a nih pawhin, mi vengvá, hmalaknaa tui leh a ti àwm mi tak dah ṭhin ni se.

Managing director atan chuan politician ni loin, mithiam, thiamna bik nei ruat ṭhin ni se a fuh zawkin a rinawm. Hetiang hi tun hma pawha tih dan ṭhin tho a ni a, sumdawnna, management leh corporation lama sûlhnu nei ṭha dah ṭhin ni thei se a duhawm.

COPU Report hian MAMCO leh ZIDCO ten an din chhan ti tawh loin, construction work chauh an khawih ve ve tawh avangin hmun khata chhûn fin (merge) a rawt bawk. Report tarlan danin, thlai thar hralhna lam buaipui tura din MAMCO leh industry tihhmasawnna hna thawk tura din ZIDCO te hian an din chhan ang hna an thawk tawh lo ve ve. COPU rawt ang hian, MAMCO leh ZIDCO te hi chhûn fin ni se, sorkar tan leh ram tan thil ṭha zawk a nih a rinawm.

COPU rawtnate hi sorkarin uluk taka zirin bawhzui ngei se, tihhlawhtlin dan kawng zawng se; PSU chungchangah hian sorkarin ram leh hnam tana ṭha ber turin huaisen takin thutlukna siam teh se.