Aizawla lirthei pung chak lutuk hi

Transport department chhinchhiah danin, 2025 kum chanve, January-June chhungin Mizoramah lirthei 14,911 ziah luh a ni. Lirthei 14,911 zinga 10,828 chu Aizawl DTO hnuaia ziah luh niin, 72.62% a tling a; lirthei 4,083 (27.38%) chu DTO dang pasariha mi a ni.

Kum chanve chhunga lirthei ziah luh zat hi chawhrualin ni tin lirthei 82 aia tam hret (82.38) ziah luh ang a ni a, Aizawl DTO bik chauh pawh ni tin lirthei 60 dáwn (59.82) ziah luh a awm ang a a ni. Sorkar chawlh ní (pisa chawlh ní) paih phei chuan ni khata ziah luh zat chawhrual a tam lehzual.

Mizoramah lirthei a pung chak hle tih a lang a, Aizawlah a pung chak lehzual. Lirthei pung chak lutuk hi thil ṭha nge ṭha lo tih hriat a har a; ngaihdan a inang lo ang. Ṭhatna leh ṭhat lohna awm karah a ṭhat lohnain a bûk rit zawk mahin a lang.

Aizawl hi a ṭhang zel a, a la ṭhang zel ang; tun hmaa khaw chhung ni ngai lo tam tak chu tunah chuan khawpui chhung hulûm tak a ni tawh. Mihring pawh an pung a, lirthei pawh a pung zel tur a ni. Chutihrualin, lirthei a pung chak lutuk hi chu khawpui leh kawngpui dinhmun ngaihtuahin, ngaimawh chi niin a lang a, a punna tihhniam theih a ṭhain a rinawm.

Aizawla lirthei pung chak lutuk hi thunun a hun tawh a, thunun theitu chu sorkar a ni. Lirthei pung chak lutuk thunun tura pawimawh hmasa chu dan kenkawh ṭhat a ni a, sorkarin dan a kenkawh ṭhat a ngai. Langsar tak chu garage neih leh neih loh chungchang a ni a, hei hi a nihna ang taka kenkawh a hun.

Tunah chuan miin pawisa a neih chuan lirthei a duh zat zat, a duh ang ang a lei thei a, chhungkua ang leh mimal anga lirthei (private vehicle) neih theih zat bithliah a ṭhain a rinawm. Bithliah theih a nih loh pawhin, lirthei lei/nei tura neih ngai leh tih ngai te tihkhirh a, kenkawh ṭhat a ṭha ang.

Sumdawnna lirtheite pawh uluk taka enfiah a ṭul a, khawpui leh mipui mil tâwka permit pek chhuah a pawimawh. Aizawla lirthei pung chak lutuk hi sorkarin ngun taka a en zui a ngai ta a ni.