Ruihhlo ngai chhan chhuahnaa ṭanrual

Mizoram sorkar, kohhran leh tlawmngai pawlte chuan ruihhlo ngaite enkawla chhan chhuahna turin Hulhliap Short Stay Centre an kalpui ṭan. Kumin June thla chawhnu lam khan Synod Revival Camping Center-ah a thawh khatna ṭan a ni a, July 12, 2025 khan zawh niin, camper-te an chhuak.

Hulhliap SCC thawh khatnaah hian mi 200 chuang an lut a, a tawp thlengin mi 119 an awm a, mipa 105 leh hmeichhia 14 an ni. Ruihhlo ngaite chu ruihhlo laka an fihlim theih nan enkawl Pathian thu chauh ni loin, taksa tihchakna lam leh an mamawh ang damawite nen kawng hrang hranga enkawl an ni.

Mahni hmuna an haw hnuah pawh a ṭul angin psychologist leh social worker mi eng emaw zatin thla thum chhung a ṭul angin an vil zui dawn a, damna changte tan thiamthil zirna leh Handholding hmangin hmalak zui tum a ni bawk.

Hulhliap SCC-a ruihhlo ngaite enkawl dan hi kalphung dik niin a lang a, hetianga hmalak a ni hi a lawmawm a, rah duhawm tak a chhuah ngei a rinawm. Camp aṭanga chhuakte hun lo kal leh zel turah an ṭha tluan vek lo a nih pawhin, ṭha tluan chhuak tlem azawng an awm a nih phawt chuan a hlâwk hrim hrim a ni.

Hulhliap SCC thawh hnihna buatsaih leh turin buaipuitute lam chu an inbuatsaih leh mek a; lut duh an ṭhahnem a, diltu an tam hlea sawi a ni. Hei hian Hulhliapin mi tam tak beiseina a siam a ni tih a tilang a, a lawmawm.

Ruihhlo donaah leh ruihhlo ngaite chhan chhuak tura sorkar, kohhran leh tlawmngai pawlte an thawkho hi a lawmawm tak zet. Ṭha takin thawkho zui zel se, ṭangrual zelin, theihtawp chhuah zel se la, mipui lam pawhin he hmalakna hi ṭha takin thlâwp se; ram leh hnam tan rah duhawm tak a chhuah zel ngei ang.

Hulhliap SCC hian sum leh pai a ngai a, sum leh paia mamawhte pe turin sorkar, kohhran leh tlawmngai pawlte an inhawn a ngai chhoin a rinawm a, mipui lam pawhin ṭanpui theihna an nei ang. Sum leh pai leh thil dangah ṭanrual a pawimawh zel dawn a ni.