Intlân chhâwkna hmun tihdanglam

Coordination Committee on Traffic Management hotute July 11, 2025-a ṭhukhawm chuan Aizawla lirthei intlan chhâwkna hmun tihdanglam hret an rêl a, a ṭhat leh ṭhat loh hriat nan thla khat chhung enchhin an tum.

Tuna Aizawla lirthei intlân chhâwk hian Aizawl khaw pumpui a huam. Kalphung tihdanglam hret a, thla khat chhung enchhin dan tur ruahmanah erawh chuan khawpui chhunga tlangdung kawngpui (main spine) bakah, Temple Square-Vaivakawn leh Hunthar Veng deuhte chauh a huam dawn a, hmun dang a huam dawn lo.

Aizawlah hian traffic jam a nasatna hmun chu tlangdung kawngpui (main spine) a ni a, Kulikawn-Bawngkawn inkar kawngpui hi chu veng pênhleh aṭanga lirthei chhuak zawng zawng luh khawmna a nih avangin hmun eng emaw zatah jam a nasa ṭhin.

India ramah hian traffic jam hi khawpui nihphung pakhat a ni ve a, state dang khawpuiahte pawh hmun tam takah traffic jam a nasa ṭhin. Aizawlah pawh main spine bika traffic jam ṭhin hi nilêng deuh thaw leh ni tin tih theiha thleng a ni a; tihziaawm theih a ni mai theih laiin, tihreh theih erawh a ni kher lo ang.

Coordination Committee on Traffic Management-in ruahmanna thar an enchhin tur hi eng nge a an dawn tih sawi lâwk theih ni lo mah se, a lan danah chuan thil ṭha tak tur a nih a rinawm.

Committee-in enchhin dan tur a ruahman anga intlân chhâwkna hmunin a huam loh kawngpuiahte hi chuan ni tina traffic jam ṭhin ang chi a awm meuh lo; main spine angin lirthei tlân a tam ve loh vang a ni ber. Traffic jam a awm pawhin, kawngpui sira lirthei inhûng leh thil eng emaw bik vang a ni tlangpui a; nilêng deuh thaw leh ni tina jam ang chi a ni lo tlangpui.

Lirthei tlân tlêm zawkna hmun leh ni tina traffic jam awmna ṭhin hmun ni lo, veng chuanhnuai leh pènhlelh deuh zawka lirthei intlân chhâwk kalpui ve loh hi thil ṭha tak a nih a rinawm a; mipui tan pawh thil ṭha tak a ni ang. Main spine bikah erawh intlân chhâwk a nih miau avangin, main spine-a traffic jam tizualtu a ni lo turah ngaih theih a ni.

Coordination Committee on Traffic Management ruahmanna thar a enchhin tura a tih, lirthei intlân chhâwk dan tihdanglam hret hi mipui tana ṭha leh remchanna tam tak thlentu a nih ngei a rinawm e.