Khawlaia ruihhlo ti ṭhinte thenfai

Tun hnaiah Aizawl khawpui lûn lai hmun hrang hrangah ruihhlo ngaite an zalên thar a, khawlaia damdawi rûi hmuh tur leh inchiu hmuh tur an tam tial tiala sawi a ni. A bik takin Vanapa Hall leh chhehvelah te, Lammual bul flyover bridge-ah te, Aizawl Lei velah leh hmun dangahte an tam zual niin a lang.

Hetianga Aizawl khawlai lûn laia ruihhlo ti ta maite leh rûi thle mai mai hmuh tur an tam tak viau chhanah hian puh tur tam tak a awm thei ang. Sorkar emaw, pawl leh mimal tu tute emaw puh deuh bik turte pawh an awm a ni thei.

Aizawl khawlaia ruihhlo zalên ta lutuk te, rûi thle mai mai hmuh tur tam ta te, hmun ualau lai, mi hmuh theiha damdawi ruihhloa inchiu ta maite hi mipui nâwlpui tan a him lo a, a ṭha lo. A bik takin hmeichhiate leh naupangte hmuh atan a ṭha lo lehzual. Chuvangin, tihtawp tura hmalak a ṭul a, nasa taka ṭan lâk a ngai a ni.

Mi tam tak chuan ruihhlo ti ṭhinte hian thlavâng hauhtu an nei tih an inhriat avangin an huangtau tial tialah an ngai a; a dikna chin a awm ang. A ṭul chinah chuan ruihhlo ti ṭhinte thlavâng hauh a ṭha a, chutih rualin, a nghawng awm theite ngaihtuah tel a ṭha âwm e.

Ruihhlo ti ṭhinte diriam si lo leh dan bawhchhe si loin khawpui lûn laia ruihhlo ti an tam lutuk leh, ualau taka ruihhlo an tih tâk mai ṭhinte hi tihtawp dan a awm ngeiin a rinawm a; ngaihtuah tlan a ngai a ni.

Aizawl hi state khawpui ber a nih angin Mizoram hmél lanna a ni a, hnam dangte'n Mizoram chungchanga ngaihdan an siamna lian ber pawh a ni. Chuvangin, ruihhlo chungchanga Aizawl thenfai leh tihthianghlim kawngah pawh tih tak zeta ṭan lâk a ṭul ta niin a lang.

Ruihhlo ngaite khawpui chhung hmun lûn laia langsar taka an chêttlat lohna turin ṭan lâk tlân a ngai. Sorkarin mawhphurhna leh tih tur tam tak a nei a, nasa zawka hma a lak a, dan kenkawh ṭhat a ṭul. Kohhrante'n an tih àwm chin a awm a, tlawmngai pawlte hmalakna àwm tak a awm a, mipui nâwlpui tan pawh tih theih chin a awm. Kan mawhphurhna ṭheuhte ṭha taka kan bawhzui a, theihtawp chhuaha hma kan lâk tlân a ngai e.