Sorkar hnathawk tih loh tur tite vau

Education Minister chuan July 11, 2025-a press conference a neihnaah, sorkar sikula zirtirtu, an thawhna hmun sawn (transfer) zingah insawn hreh vanga khawtlang leh páwl pun chíng an awm tih a sawi a, chutiang tih chingte lakah chuan sorkarin a ṭul angin action a lak dawn thu a sawi. Khawtlang leh pawlte chu sikul zirtirtu dinhmun hre chiang lehzual tur leh sorkar hmalakna ngaichâng thiam turin a ngen bawk.

Sorkar hnathawkte hi sawn theih an ni a, sorkarin a dunna hmunah sawnin a awmtir ṭhin. Sorkar hnathawk zawng zawngin sawn theih an ni tih an hre chiang hle; an duhna ber hmunah kher awm theih a ni lo tih te, an duh lohna ber hmunah pawh dah theih an ni tih pawh an hre chiang viau.

Chutiang chu thil nihphung a ni chunga sorkar hnathawk zingah sorkarin a sawn a, hmun/khaw danga awm tura tihte zingah sawn an nih lohna tura khawtlang emaw, zirlai pawlte emaw hnena zualko an awm ṭhin hi a zialo tak zet a, an tih loh tawp tur a ni.

Education Minister-in an department mi leh sa sorkarin a sawnte zinga khawtlang leh zirlai pawlte hnena zualko chingte a vaukhân hi mi ṭhenkhat chuan sorkar hnathawkte vauna ang zawngin an sawi ang. Eptu party-te phei politics-a inbeihna remchangah an hmang duh mai thei a, sorkar hnathawkte vau-ah sorkar an puh duh mai thei. Zirna siamṭhat kan duh tak tak a nih chuan lo insûm a ṭhain a rinawm.

Minister-in vaukhânna thu a sawi hi sorkar hnathawkte emaw, zirtirtu zawng zawng emaw vauna a ni lo a, thil dik lo titute leh an tih loh tawp titute vauna a ni. Sorkar hnathawk, thil dik lo titu na nâ nâ chu vau a ṭul ve bawk a, a ṭul anga hrem pawh a ṭha; vau loh leh an chunga action lak a nih loh chuan thil dik lo tih a hluar tial tial lo thei lo.

Zirtirtu an ni emaw, sorkar hnathawk dang pawh ni se, ram leh hnam leh zirnaa hmasawnna tur a nih chuan sorkar hi huaisen takin kal zel se la; beihna karah pawh thu dikah chuan nghet takin ding tlang ngam rawh se.

A pawimawh ber chu transfer & posting rules ṭha tak neih a ni a; neih tumin sorkarin hma a la meka sawi a ni a, chak lehzualin hma han la sauh sauh teh se.