Central-a kutdawh leh intodelh

Mizoram Chief Minister chu Delhi lamah a zin mek a, a châm chhungin sorkar laipuia minister te bakah, ministry leh agency hrang hranga hotu liante a kâwm a, Mizoram mamawhte a thlen a ni.

Tun hma aṭanga tun thlengin Mizoram CM ni tawhte leh ni mek hi Delhi-ah an zin ṭhin a, minister dangte pawh an zin ṭhin. Hetih lai hian, eptu party-te chuan tuna CM leh minister-te hi sorkar laipui aṭangin state hmasawnna tur sum leh project sawi chhuah leh Mizorama hawn nei loah an puh ve mek bawk.

CM leh minister-te sorkar laipui hmunpui Delhi-a an zin hian sorkar laipuia hotu liante dàwrin, Mizoram mamawh hrang hrang an thlen a, Mizoramin project a thehluhte bawhzuiin, sum leh paite pawh an dil ṭhin. Tun hma aṭanga tun thlenga tih ṭhin dan a ni.

Mizoram kan intodelh lo a, ei leh bàr leh thil dang dangah kan khamkhawp kan thar lo. Sum leh paiah kan state budget pumpuia 10% vel emaw chauh kan intum thei a, 90% dáwn chu sorkar laipui aṭanga kan hmuh a ni ṭhin. Sorkar laipui kan pùr lo thei lo a, tun hma ṭanga tun thlengin kan pùr zel rêng a ni.

Sorkar laipui aṭanga sum hai lut tam thei leh hmasawnna hna thawh tur project lian sawi chhuak tam thei nih hi political party ṭhenkhat chuan intihtheihna atan an hmang ṭhin niin a lang a; thil àwm lo lutuk a ni lo. Chutihrualin, kutdawh rilru kan pu lian hle a ni tih lantirtu a ni thei bawk.

Kan intodelh lo a, sum thawh chhuah kan nei tlem a, sorkar laipuiah kut kan dawh lo thei lo miau a; sorkar laipuiah hian sum kan lan dil zel ang a, Mizoram hmasawnna ruhrel dinna tur pawh kan la dil zel ang.

Central-ah kut kan dawh loh theih loh karah hian intodelh tumna tak tak sorkar leh mipuiin kan neih a pawimawh. Kawng hrang hranga kan state intodelh theihna tur te, sorkarin mahnia sum a thawh chhuah tam theih dan turte hi tun aia ngaih pawimawh zual a, na zawka hmalak a ṭul.

Sorkar hian sum a hmuh mekna hrang hrangah hian kim taka a hmuh theih nan ṭan la se, mipui lam pawh chhiah pek chungchangah kan inhawn deuh deuh a ngai a ni.