SDG leh Mizoram hmasawnna

Kum 2023-24 chhunga UNO Sustainable Development Goals (SDG) tihlawhtlinna tura hmalaknaah Hnahthial district chu India hmarchhak state-a district 121 zinga ti ṭha ber a ni a, Champhai district pahnihna a ni.

NITI Aayog-in July 7, 2025-a hmarchhak state-a district 121-te'n SDG tihhlawhtlinna tura hma an lakna leh hmasawn dan zirchianna a tihchhuahah Hnahthial leh Champhai district-te pakhatna leh pahnihna an ni thei hi a lawmawm tak zet a, Mizoram tan hmingṭhatna a ni.

Mizorama district dangte pawh an che ṭha tlangpui a, district dang panga chu hmarchhaka district 121 zingah a ti ṭha zual 20 zingah an tel. Chutih laiin, Mizorama chhim lam leh khawtlang lam district palite erawh an dinhmun a sang vak lo a, an ṭan lehzual a ngai niin a lang.

SDG hian tum (goal) 16 a nei a; chung zingah chuan retheihna ûm bo, hriselna leh zirna ṭha pek, mipa leh hmeichhia intluktlânna, tui leh thianghlimna lama hmasawn, hmasawnna ruhrel ṭha, rethei leh hausa kar zau tihzîm, sik leh sa lama hmalakna, kawlphetha, ei leh bar leh hna lam ṭhate a tel. Ram leh mipui hmasawnna turin a pawimawh em em vek mai.

SDG hi khawvel huapa hmalakna a ni a, India ram pawhin ngai pawimawhin, SDG tihhlawhtlinna turin theihtawp a chhuah a; India ram chhunga state leh union territory tinte pawhin nasa takin ṭan an la bawk. SDG hi ram leh a chhunga cheng mipui hmasawnna tura pawimawh tak a ni a, SDG-a intehnaah kan dinhmun a san chuan hma kan sawn tial tial tihna a ni.

Mizorama district tinte hi hmarchhaka district zingah SDG-a hmasawn ber district ni vek thei se, tehnaah pawh a ti ṭha ber ber ni vek thei se a duhawm hle mai a; chutiang tur chuan district tinin thâ thlah loin theihtawp chhuah vek zel se.

Kawng hrang hranga Mizoram pum hmasawnna tur leh SDG index-a che ṭha ni turin district tin kan ṭan lehzual a ngai. District administration ṭheuh an pawimawh hle a, anni hian ṭan han la lehzual se. Sorkar department tin te, village/local council te, pawl hrang hrangte leh mipuite pawhin kan khua, kan district leh kan ram hmasawnna turin ṭan kan lak thar zel a pawimawh.