Zirna leh zirlai dah pawimawh

Mizoram sorkar chuan sikul ṭan hun, academic session leh sorkar sikula naupang uniform inang tlang chungchangah mipuiin an duh dan an sawi theihna hun a hawng a; mi 200 chuangin an ngaihdan ziakin an thehlut tih School Education Director-in a sawi.

Sikul kaihhnawih thil chi thum chungchangah hian School Education department-in July 7, 2025 khan vantlang inràwnkhawmna, 'Public Consultation Meeting' an buatsaih bawk a; sikula zirtirtu pawlte leh NGO ṭhenkhat aiawhte bakah, mimal ṭhahnemngaite'n an ngaihdante an sawi a ni.

Thil chi hrang hrangah kalphung thlâk a nih dawn chuan kalphung hman mekin ṭhat tâwk lohna chhuanlam tling tak a nei tur a ni a; ṭhat tâwk lohna lian tak a awm chiah lo a nih pawhin, kalphung thar hman tum chuan ṭhat zawkna lian tak a nei tur a ni.

Chhan ṭha tâwk tak awm si loa kalphung thlak fo hi ze nghet lohna leh mumal lohna a ni a, mi tam tak tibuaitu leh harsatna thlentu a ni thei bawk. Chutih rualin, tih dan leh kalphung ngai hi a ṭha reng chuang lo a, inthlâk danglam a ṭul hun a awm.

Sikul academic session, common uniform leh ṭan hun chungchangah hian Mizoram zirna a ṭhat phahna tur leh zirlaite tana remchanna leh ṭha ber tur kan ngaihtuah tur a ni. Thil ṭhenkhatah hi chuan zirna hmasawnna leh zirlaite remchanna ai mahin, zirtirtute remchanna leh nawmsakna tur thil pawh awm palh thei a ni a; fimkhur taka ngaihtuahna sen a ṭul ang.

School Education department-in sikul kaihhnawih thil chi thumah mipui ngaihdan a la te, vantlang inrâwn-khawmna a buatsaih hian ṭhatna a nei ngei ang a, thuneitute-ah ngaihdan zau zawk a pek belh ngei a rinawm.

Chutih rualin, mi tam ber ngaihdan leh duh dan hi ram leh hnam leh mipui náwlpui tana ṭha zawk vek lem lo tih erawh hriat tel a ṭha. Ngaihdan thawhtu zingah Mizoram zirnain hma a sawn phahna tur te, Mizoram puma zirlaite huapzo khawpa thil ṭha zawk tur ngaihtuah thleng si loa mahni remchanna leh awlsamna thlir râna ngaihdan thawh pawh awm theih a ni.

Sikul academic session, common uniform leh ṭan hun chungchang hi thuneitute'n uluk takin ngaihtuah zui se la; Mizoram zirnain hma a sawn phahna tur leh zirlai nâwlpui tana ṭha ber tur dah pawimawh ber rawh se.