Chi pêngte inhriatthiam tawn a ngai

Chawlhkar liam ta tawp lam khan Myanmar Chin state-a Mizoram (Zokhawthar) bul maiah Zo hnahthlak pawl pahnihte inbeiin, silaiin an inkâp a, mitthi an awm bakah, tualchhung mi nunau tam tak sahimna zawngin Mizoram lamah an rawn lut a ni.

Zokhawthar piah lawka inkahna a reh chauh a, Vaphai Saikhumphai lamah inkahna a awm zui leh a, thi leh hliam an awm leh awm loh hriat chian ni lo mah se, mi tam tak sahimna zawngin Mizoramah an rawn lut leh bawk.

Myanmar ram chhunga kan Zo hnahthlakpui ve ve an inhmu thiam loh leh silai hial an lek te, thihna hial a thleng leh nunau mangang thlabára an awm hi a pawi tak zet a, a zahthlak tel bawk.

Hetianga inhmuh thiam lohna a awm chhan hi tun hma aṭang tawha thil inchuh neih vang te, ramria Mizoram (India) lam nena insumdawn tawnna kawngka thununtu nih inchuhna vangte niin an sawi a; a bul berah chuan mahni hmasialna vang a ni a tih theih ang.

Heng inhmuh thiam lohnate hi inpawh tlang taka sawihoa chinfel theih a nih ngei a rinawm a; chumi tur chuan tuna inhmu thiam lo pawl hruaitute'n rilru zau tak pu se a duhawm. Mipui zingah pâwngpawrh deuh an awm a nih pawhin, hruaitute'n zâwldawh taka hma an lak a ngai a ni.

Chin state-a Zo hnam inhmu thiam lo leh inngeih lo taka awm mekte karah remna a awm theih nan Central YMA chuan hma a la nghal vat a; sorkar lama hotute pawhin sorkar ang ni lo, mimal ṭhahnem ngaihnain hma an la nghal vat niin a lang. Hetianga huhâng ngah tak takte'n inremna zawnga hma an la hi a lawmawm a, rah ṭha a chhuah ngei se a duhawm.

Mizo-ah hian hnam péng hrang hrang kan awm a, hnam pêng hrang hrangte hi kan inzah tawna kan inhriatthiam tawn a ngai. Inhriatthiam tawnna tel lo chuan a nunho theih loh a, hmasawnna a awm thei lo.

Hnam khat, u leh nau, Zo leh Zo kan innghirnghoa kan indo chuan kan hma lam hun a êng lo hle dawn. Chi bil hamṭhatna ni loin, Zo hnahthlak pumpui hmakhua kan ngai zawk tur a ni.

Mizoram chhehvela Zo hnahthlak hnamte inrem taka awm tlân a ngai a, tuna inhmuh thiam lohnaah pawh inrem ngei a ngai. Inrem turin mi dang huatna rilru dah bo ila, remna kawng i zawh ang u.