Kohhran luang chhuak a lawmawm

Synod Hospital chuan sum kum 2024-25 chhung khan an damdawi-ina damlo enkawl mi 882 chu man an peksak a, Rs 1,96,35,969 an hmang. Mi 882 zinga mi 256 chu kohhran pawl dang leh Kristian ni lote an ni.

Tun hnai kum nga kal ta chhungin damlo zinga khawsak harsa, damdawi-ina awm man pe thei lo mi 3,259 awm man 7,29,39,263 an peksak tawh a; chutih laiin, Synod Hospital-a enkawl damlo mi 480-in awm man an la bá a, an bat zat belhkhawm chu Rs 2,03,59,678 a tling.

Synod Hospital-a damlo inenkawlna leh damdawi-ina awm, khawsak harsa zawk, awm man pe thei lote kohhran pawl leh sakhaw dang mite thliar hauh loa cheng tam tak peksak a ni hi a lawmawm a, a ropui a, damlote tan a hlu hle. Kohhran leh kohhran mipuite'n ṭhahnemngai taka thawhlawm an thawh ṭhin pawh a lawmawm a, a ropui a ni.

Kum khat chhunga mi harsate tana cheng nuai 196.35 an hmang leh, kum nga chhunga khawsak harsa mi 3,259-te tana damdawi-ina awm man cheng nuai 729.39 an peksak hian mi harsa zawkte tan kohhran a luan chhuah nasatzia tichiangtu pakhat a ni.

Mizorama kohhran pawl hrang hrang hmunpui theuh te, tualchhung kohhrante hi kawng hrang hrangin sum leh pai sengsoin an luang chhuak nasa a, a lawmawm tak zet a, tun aia nasa zawkin chhunzawm zel se a duhawm.

Kohhran tam ber chuan an luan chhuah dan an puangzar lêm lo a, an luan chhuah dan hi mi tam tak chuan an hre chiang lêm lo. Kohhran dangte chêt dan chu sawi loh, kan awmna kohhran hmalak dan pawh kan hre chiang tâwk lo fo.

Hetih lai hian, kohhran hian sawiselna a tâwk fo a, mi ṭhenkhat chuan na tak takin an sawisel bâwng bâwng ṭhin. Sawiselna ṭhenkhat hi chu sawiselna àwm tak pawh a ni ngei ang a; sawiselna tam tak erawh chu thil hriat chian loh vang leh ngaihtuah chian loh vangte niin a lang.

Kohhran hi sawisel thiang lo a ni lo a, sawisel loh tur a ni lo. Chutih rualin, sawiselna tam tak hi chu hriat chian loh vang a ni duh viau. Kohhran a ni emaw, sorkar a ni emaw, pawl leh mimal emaw pawh ni se, mi kan sawisel hmain thil nihna tak ngaihtuah chiang hmasain, hriat chian tum hmasa ṭhin ila a ṭha. Hre chiang si loa thil sawi pawp pawp hi chuan a sawitu zawk mualphona theih a ni ṭhin.