Khualzin rêl lut tur leh ILP endik

Chief Minister chuan kumina Lammuala Remna Ni lawmnaah, Sairang thlenga rêl tlântir a nih dawn avangin Inner Line Permit-ah inbuatsaih nasat a ngai thu a sawi.

Mizoram Merchant Association hruaitute'n July 1, 2025 khan Home Minister an hmu a, Sairang thlenga rêl lut tur avangin rél chawhmunahte ILP endikna changtlung tak siam an duh thu leh khawng taka ILP endik an duh thu an thlen.

India ram mipui tlukleh-dingawn chuang fé zingah Mizoram mipui nuai 13 vel hi chu a tlêm hle a, 0.1% vel chauh a ni. Khawvel changkang zel leh hnam hrang hrangte intlawhpawh tawh tak karah hian Mizote kan la tlem em avangin Mizorama cheng tribal-te hi a bik taka humhim ngai kan la ni reng. ILP hi Mizoram leh Mizo hnam venhimna ṭangkai tak a la ni reng a, a hlu hle a ni.

Tun hma aṭang tawhin Bairabi thlengin rel a rawn lut tawh a, tunah Sairang thlengin rêl kawng siam zawh thawkhat a ni tawh a, bungraw phur bakah, khualzin phur rêl tlantir tum a ni.

Khualzin phur rêl tlantir a nih dawn avang hian tun aia tam zawk hnam dang an rawn lut ngeiin a rinawm a; chuvangin, khauh lehzualin ILP endika kenkawh a ngai ngei dawn. Chief Minister-in a sawi angin, ILP hi namnûl mai lo a, ṭha taka kenkawh a nih theih nan tun aṭangin nasa taka inbuatsaih a ṭul.

Bairabi leh Sairang inkara rêl chawlhhmunahte ILP endikna changtlung tak siam ni se, rêl tlantir a nih hunah pawh uluk takin ILP endik ngei ni rawh se.

Sairang thlenga rêl rawn lut turah hian sorkar hian ILP a ngaihthah tur a ni lo a, tun aia khauh zawka a kalpui a ṭul dawn a, tun aṭangin ṭha taka inbuatsaih a ngai. MIMA-in an rawt angin, rêl chawlhhmunahte hian hnam dangte awlsam taka an pût chhuah rûk theih loh nan ṭha taka hung a ṭhain a rinawm.

ILP hi hmun dangahte pawh uluk lehzuala endik a ṭul. Mizoramah hnam dang ILP nei lo leh ILP thi tawh chunga awm an tam hlea ngaih a ni reng a; ILP pangngai leh temporary ILP pe chhuaktute an fimkhur lehzual a ngai a, ILP nei lote ṭha lehzuala endik a ngai bawk.