Thlai leiah ṭha zawka inbuatsaih ni se

Mizoram sorkarin kumin 2025-a sawhthing leh thlai dang a lei chu June 30, 2025 khan khâr a ni ta a, Irrigation & Water Resource department conference hall-ah Chief Minister hoin khârna inkhawm hman a ni.

Khârna inkhawma tarlan danin, June 27, 2025 thlengin sorkarin sawhthing quintal 2,33,604 a lei a, chuta tan chuan cheng vbc. 96.4 a pe. Sawhthing hi June 30 thleng khan lei a ni a, lei zat leh sum sen zat hi a la danglam thei. Mizo buh thar qtl 1,473 lei niin, sorkarin cheng nuai 44 vel a sêng a; aieng qtl 400 an lei. Hmunphiah qtl 40,327 lei niin, sorkarin cheng vbc 2 a sêng. Hmarchaah erawh sorkar a inrawlh a ngai lo.

Thlai lei khârnaah Chief Minister chuan, ZPM sorkar chu thlai leiah inzir chunga an kal chungin an hlawhtlin thawkhat thu leh, loneitute pawh an lawma an hriat thu a sawi a; nakkumah pawh thlai an lei leh dawn thu a sawi bawk.

Sorkarin inthlan dawna an intiam anga thlai chi li bakah, an intiama tel lo, Mizorama thar buhhûm a lei hi a lawmawm a, sorkar hmalakna a fakawm. Kut hnathawktu tam takin an thawhrim rah senga sum leh paia hlâwkna an hmu hi a lawmawm tak zet.

Chutih rualin, sorkarin thlai a leiah hian tih fuh loh leh felfai tâwk lo a awm ve bawk. Sawhthing an lei vek dawna sawi a ni a, mahse, a takah chuan an lei vek lo tih a lang. Sorkar hotute'n qtl nuai 10 chuang daih thar beisei a nih thu an sawi laiin, qtl. 2,33,604 chauh lei a ni a; qtl. nuai 10 aṭanga chhût pawhin 24% pawh a tling lo. Hmunphiah lei danah felfai lo leh neuh neuh a awm bawk.

Sawhthing hi Mizorama kut hnathawktu tam tak innghahna a ni a; sawhthing hralh leh lei danah sorkar inbuatsaih dan a ṭha tâwk lo a, a che muang deuhin a hriat. Hei hi kut hnathawktu tam takin an tuar ngei ang a, mi tam tak chu an beisei angin an hralh thei lo ngeiin a rinawm.

Sorkarin kum lo la kal leh tura thlai a lei leh turah chuan kumin aia ṭhain inbuatsaih se. Sawhthing bikah, a chawh hun pangngai leh hralh ṭhin hunah kut hnathawktute'n an hralh zawh vek theih nan hma la ngei tawh rawh se.