Jordan Centre hman ṭangkai a ṭul

Central YMA hruaitute chuan June 9, 2025 khan Chief Minister an kâwm a, Seṭhawna ruihhlo ngaite enkawlna Jordan Centre cheibâwl thar leh rawtna an thlen. CM chuan, sorkarin ruihhlo ngaite enkawlna turah ngaihtuahna a sên mek thu leh Jordan Centre chungchangah sorkar leh kohhrante an indawr mek thu a lo hrilh.

Aizawl dáia ruihhlo ngaite enkawlna hmun pakhat boruak avangin sorkar leh kohhrante ruihhlo ngaite chungchangah an harh thar niin a lang a; a lawmawm. Mi tam takin sorkar leh kohhrante hi ruihhlo ngaite enkawlna lian leh ṭha tak din turin an beisei viau niin a hriat.

Mizoram sorkarin ruihhlo ngaite enkawlna hmun a neih sa, hmunhma rem tak leh ruhrel ṭha tak awm sa Jordan Centre cheibâwl thar leh tura CYMA hruaitute'n CM an ngen hi sorkarin tihpuitlin ngei se a duhawm.

Jordan Centre hi sorkar chuan mi dang enkawltir tumin hma a lo la tawh a, mahse, enkawl duh an hmu zo lo. Kohhrante enkawltir tumin sorkarin hma a la leh a, kohhrante an indawr mek a ni.

Jordan Centre hi din a nih ang taka hman ṭangkai a ṭul a, ruihhlo ngaite enkawlna changtlung tak ni ngei se a duhawm; chutiang tur chuan sorkarin hma la zui zel se. Kohhranin an enkawl dawn a nih pawhin, a enkawlna leh thawktute tana sum senso ngaite sorkar hian a tumsak vek thei lo a nih pawhin, eng emaw zat tumsak thei se a ṭha hle ang.

Ruihhlo ngai enkawl chungchangah hian dan ang taka kal theih a ṭha ber a; dan ang diak diaka kal theih a nih loh pawhin, kal pènsan thui lutuk lo a, a theih chin chinah dan zawm a ṭha.

Kristiante chuan Pathian hi mihring leh khawvel siamtu, engkim ti thei, damlote tidama mitthite pawh kai tho leh thei a ni tih hi kan rin dan a ni. Pathian rinchhana miin ruihhlo ngaite enkawl hna an lo thawk ṭhin pawh a àwm viau. Dan zâwm zel chung leh Pathiana innghat tlat chunga enkawl dan kalpui theih a ṭha hle ang.

Sorkar a ni emaw, kohhran a ni emaw, ruihhlo ngai enkawl chungchangah fimkhur a ṭul a, zawh tâwk hriat a ṭha. Tute emaw ṭawng chak lutuk vanga tih phut phut chi a ni lo a; fimkhur taka hmalak a, sum leh pai, tha leh zungin a tlin tâwk tur zela hmalak a ṭha e.