Thiamnaa tling lote bàn ni rawh se
Mizo Students' Union hruaitute'n June 9, 2025 khan Chief Minister an hmu a; Mizoram sorkara college-a zirtirtu, sorkarin hun a pek chhunga National Eligibility Test emaw, doctor of philosophy (PhD) emaw la nei lo mi 29-te chu academic session 2025-26 ṭan hma ngeia an contract titawpa bàn turin an ngen.
Mizoram University Research Scholars’ Association (MURSA) pawhin June 13, 2024 khan Higher & Technical Education Minister hnenah, Mizorama college zirtirtu zinga qualification neih ngai nei lote chu Mizorama zirna tihniamtu an nih thu leh, college zirtirtu ni tura thiam/degree neite chanvo chhuhsakna a nih thu an lo thlen tawh bawk.
2024 kum laihawl vela RTI Act hmanga zawhna chhannaa a lan danin, Mizoram sorkar college-a zirtirtu casual/part time-a thawk zinga mi 30 chu college-a zirtir hna thawk tura danin a phût ang thiam nei lo (unqualified) an ni.
June 9, 2025-a MSU tarlan danin, NET/PhD nei lo college zirtirtu mi 29 chu sorkarin kum khat dang hun a pek belh niin a lang a, a zialo tak zet.
June 13, 2024-a MURSA-in an kawmnaah HTE Minister chuan, Mizoram sorkar enkawl college-ah zirtirtu qualify ngeite chhawr a nih theih nan theihtawpa hma an lak mek thu a lo hrilh. Mahse, kum khat a liam dawn ta; tun dinhmun ngaihtuahin, sorkar leh HTE Minister hian theihtawp chhuah chu sawi loh, hma an la tak tak lo zawk em ni tih ngaihtuah theih tak a ni ta.
Thiamnaa tling lote college zirtirtu atana hman reng hi dan loa thil tihna a ni a, sorkarin dan loin zirna a kalpui mek a, dan a bawhchhe mek tihna a ni. College zirtirtu nih tuma zirna hautak tak paltlanga thiamna leh degree neih ngai hrang hrang nei tawhte chanvo chhuhsakna a ni bawk.
College zirtirtu ni tura thiamna leh degree neih ngai nei lote sorkarin college zirtirtu atan a chhawr reng hi a dik lo tak zet. Hun rei tak degree ṭul ang nei turin hun pek an ni tawh a, tun thlenga la nei lote chu sorkar hian chawlhtir tawh se la, college zirnain a tawrh loh nan academic session 2025-26 ṭan hmain zirtirtu qualify ngei lâk ni rawh se.