Hnam dang chênpui leh dan zawm

Inrinni kal ta kha Id-Ul Zuha (Bakrid) a ni a, Islam sakhaw ni pawimawh berte zinga mi a ni. Mizorama Mosolman-te pawhin an hmang. Aizawl Mosque Committee huaihawta Joint YMA Field-a Mosolman-te ṭawngṭainaah Muslim Welfare Society Mizoram General Secretary chuan Mizorama Muslim awmte chu ṭha taka dan zâwm tur leh Inner Line Permit dik taka nei turin a chah a, Mizoram mipui rem taka awm zel turin a chah bawk.

Mizorama Muslim pawl hruaituin an mi leh sate dan ngai pawimawha zâwm tur te, Mizoram bika dan zawm ngaite pawh ṭha taka zâwm tura a chah hi a lawmawm. He thuchah hi Mizorama Muslim-te'n ṭha takin zawm se, ram leilung fate zai ngai takin khawsa thiam se a ṭha hle ang.

Muslim pawl hruaitu thuchah hi Muslim-te tan chauh ni lo, hnam tin leh sakhaw dang vuantute tan pawh a pawimawh; Hindu-te leh Buddhist-te tan a pawimawh a, Kristiante leh ram leilung neitu Zo fate tan pawh a pawimawh.

Khawi hmunah pawh awm ila, dan zawm hi mi tin mawh a ni. Ram danga kan kalin kan kalna ram dan kan zawm a ngai a, kan zâwm ṭha tlangpui bawk. Chutih laiin, kan ram dante hi kan ngai pawimawh tâwk lo fo a, kan zâwm ṭha tâwk lo fo niin a lang.

India ram leh Mizorama chêngte hian kan ram dante leh Mizoram state bika dan leh thupekte tun aia kan zawm ṭhat lehzual a ṭul. Dan leh thupekte hi ram leh hnam, mipui nâwlpui tana ṭhat tlanna tur, kan himna tur leh, hma kan sawn zelna tur leh nun nuam zawk kan neihna tur a ni tih hriaa ṭha taka kan zawm zel a pawimawh.

Tunlaiah hnam bil chauhin a khawsak tak tak theih tawh loh a, hnam dangte nen kan inchên pawlh a ngai a, inmamawh tawn kan ni. Tun hma anga khaw dang mite leh hnam dangte hmuh sakhi nghal ngawt ang hun kha a liam tawh a; hnam dangte kan chênpui thiam a ṭul tih kan hriat a ṭha.

Mizote hian kan rama hnam dangte kan chênpui thiam a ngai a, an lakah rilru dik kan put a ngai a, kan enkawl thiam a ṭul bawk. Chutiang tur chuan kan rilru puthmang leh kan chêt dante kan siam rem thiam zel a ngai a ni.