Tribal Affairs department din ni se

Kumin April thla khan National Commission for Scheduled Tribes hotute Mizoramah an rawh zin a; April 30-a press conference an neihah NCST Chairman chuan Mizoramah Tribal Affairs department hrang a awm lo chu ṭha lo a tih thu leh, Mizoram chu tribal tamna state a nih avangin department hranga a awm a ṭul thu a sawi.

Mizoram mipui zinga 94.45% chu schedule tribe an nia tarlan a ni a, India ramah mihring awm zat aṭanga chhûtin tribal tamna ber state a ni. Tribal Affairs department siam theih a nih laia ST tamna ber state-ah a awm si lo hi a inhmeh lo-ah a ngaih theih a, awm ngei se, kan dinhmun nen a inhmeh viau âwm e.

Sorkar laipuiin tribal-te hmasawnna tur leh hamṭhatna turin scheme eng eng emaw a kalpui a, chungte chu Mizoramah pawh kalpui ve zel a ni. Tribal-te hamṭhatna tur scheme-te Mizorama kalpui dan a ṭha thawkhat a ni thei a, chutih rualin, duhthusama ṭha a ni bik lo a, state sorkar leh ṭan official-te nasa lehzuala an ṭan a ngai.

ST-te tana sorkar laipuiin scheme a siamte Mizoramah ṭha lehzuala kalpui a nih theih nan state sorkarah hian Tribal Affairs department awm ve se awmzia a nei ngei ang. National Commission for Scheduled Tribes Chairman pawhin Mizoramah Tribal Affairs department awm se a duh thu a sawi tawh a, hei hi Mizoram sorkar hian tipuitling thei se a duhawm.

Hun eng emaw ti aṭang khan Mizoram hian sorkar laipuia Ministry of Tribal Affairs a ṭangkaipui em em a, Mizoram hmasawnna hna thawhnaah thawh hlâwk ber pawl a ni hial ang. Tribal Affairs department hranpa nei ta ila, Ministry of Tribal Affairs hi ṭangkai lehzualin kan chhawr theiin a rinawm.

State sorkar hian a duh chuan department thar a siam thei a, department awm sa pawh a ṭhiat thei a, a zawm khawm thei bawk. December 2024-a Council of Ministers meeting pawhin department ṭhenkhat chu a zawm khawm turin a rêl a ni. State sorkara department-te hi sorkar laipuia ministry mila kalpui a ṭul a, chuvang chuan Mizorama department-te hming pawh central-a ministry hming milin thlâk a ni ṭhin.

Thil hrang hrang ngaihtuahin, Mizoram hian Tribal Affairs department hranpa a neih a ṭulin a lang a, tuna a beh mekna aṭang hian la hrangin, department thar siam thei se, ram leh hnam tan a ṭha hlein a rinawm.