Hna lâk dan dik lo nghawng a ná

RTI Act tlawhchhana zawhna NHM, Mizoram Mission Director-in a chhannaah, tuna ZPM kaihhruai sorkar mek chhungin NHM hnuaia advertisement chhuah lo leh interview pawh awm loin thawktu mi pariat lak a nih thu a darh. Hei hi MZP chuan bawhzuiin, June 10, 2025 ral hmaa sût turin sorkar an phût a ni.

Tun hmain centrally sponsored scheme hrang hrangah advertisement chhuah lo leh interview awm loa lak, appointment pek tawp tawp a tam hlea sawi a ni a; a bik takin SSA, RMSA leh NHM a tamin a langsar zualin a hriat.

Sorkar kal tawhtea CSS hnuaia dan loa thawktu lak hi mi sang têl an ni hialin a rinawm. Mahse, sorkar kal tawhte'n thil dik lo leh dan loa thawktu an lo lak tawhte hi intehna tur a ni lo a; miin thil dik lo an tih avangin kan ti ve tur tihna a ni lo.

Sorkar hnaa duhsak zawngte thun hi thil ṭha a ni lo tlangpui. Chutih rualin, thiamna leh theihna inang tlangah chuan a latu azirin thawktu atana ṭha zawk tih a inan loh theih tawh avangin, duhsak zawngte lak hi chu hriatthiam theih deuh a ni tawh. Chutiang ni lo, advertisement chhuah lo leh inelna chhetê tal pawh awm loa duhsak zawngte thun ngawt hi chu a dik lo a ni.

Thuneitute'n an duhsak zawngte sorkar hnaa an thun ṭhin hi tun hma aṭanga Mizoram harsatna a ni a; sorkar hnain nasa takin a tuar thei. Police laknaa duhsak zawng thun nghawng ṭha lo pawh mi tam takin an sawi tawh ṭhin.

A thiam leh tling, theihna nei ṭha apiang la loa duhsak zawngte sorkar hnaa thun ṭhin hian nasa takin ṭhalaite rilru a nghawng. Hun rei tawh tak aṭang khan mi tam tak chuan sawipuitu neih loh chuan sorkar hna hmu ve lo tura inngaihna an nei tawh a ni; a pawi hle.

Sorkar hna lak dan dik lo avangin Mizo ṭhalai tam tak rilru hruai sual theih a ni tih hi ngaihtuah thlen a ngai. Ṭhalaite beidawnna leh thinrimna, sorkar hotute ngaihsan lohna, zahlohna leh pawisak lohna, sorkar laka lungawi lohna a awma thlâwp nghal maina rilru leh mob rule pawisak lohna thlengin a nghawng chhuak thei.

MZP-in an phût emaw, phût lo emaw, dik chu dik, dik lo chu dik lo a nih miau avangin, NHM hnuaia dan loa advertisement pawh chhuah loa thawktu lâkte hi sorkar hian sûtin, dan ang takin ti ṭha leh se, ram, hnam leh mipui tan thil ṭha zawk a ni ang.