Fimkhur chungin chî-âi lo ila

Mizoramah hun rei tak chhung Covid-19 vei an awm tawh loh hnuah May 29, 2025 khan vei mi pahnih hmuh chhuah an ni a; damdawi-inah enkawl ni mah se, ngaihtuahawm an ni lo.

Kan ramah Covid-19 vei hmuh an awm leh tâk avang hian Mizoram sorkar pawhin hma a la nghal a; May 30 khan State Level Task Force on Covid-19 ṭhukhawmin, Covid a darh leh palh pawha hmachhawn dan tur an ngaihtuah a ni.

Covid-19 a darh leh palh pawha invên dan tur leh hmachhawn dan tur sorkar hotute'n an ngaihtuah nghal hi a lawmawm a; inthlahdah loin vil zui zel se, a ṭul angin chak takin hma la zel se a ṭha hle ang.

Tun hnaiah India ram hmun ṭhenkhatah Covid-19 chi thar hmuh leh nual a ni a, Mizoramah pawh kai an awm leh ta hial mai. Mahse, tuna India rama Covid-19 veite hi an na lutuk lo hlawm a, in lamah enkawl an ni tlangpuia sawi a ni.

Covid-19 chungchanga fimkhurna tur leh hri kai lo tura inven dan turte chu kan hriat sa vek a ni; kut silfai ṭhat te, hand sanitizer hman ṭhin te, hritlâng áwm ná nei tan hmuihmai tuamna (mask) hmante a ni tlangpui. Covid-19 laka invennate hi kan ni tin nuna thil pawimawh leh kan tih atana ṭha a ni sa hrim hrim a, uar thar leh ila a ṭha hle ang.

Mizoramah Covid-19 vei an awm leh tak avangin mipui tan chî-âi phahna tur a awm lo. Covid hi hlauh loh lutuk chu thil ṭha ber a nih lo thei a; chutih rualin, hlau chiam lo ila, chî-âi lo ila, phílí lo bawk ila a ṭha. A darh viau palh pawha inbuatsaih lâwk erawh a finthlak thung.

Covid-19 a darh leh palh pawha hmachhawn turin sorkar inbuatsaih ṭha se; swab sample endik tak tak a ngaih leh palh pawha endik zung zung a nih theih nan inhmakhua se, khawl leh hmanraw lam pawh a chatlak loh nan tun aṭanga ṭan la ngei rawh se.

Mipui náwlpui pawh fimkhur chunga kan inbuatsaih lâwk a ṭul a; sorkarin theihtawp chhuah mah se, mipui kan inthlahdah chuan hri darh vak palh thei a ni tih hriain, kan hmun ṭheuhah i fimkhur zel ang u.