Ramri hung - engtin nge ni ang
Sorkar laipuia External Affairs Minister of State chuan India leh Myanmar ramri hung turin buaipui ngaite buaipui mek a nih thu a sawi a, "Indo-Myanmar ramri hung tihhlawhtlin a ni ngei ang," a ti.
External Affairs MoS sawi dan aṭangin India sorkarin Myanmar nena ramrite hung ngei a tum tih a lang. Chutih laiin, Mizorama pawl (NGO) lian tak takte chuan ramri hung loh an duh zawk thung.
YMA telin pawl panga telna NGO Coordination Committee chuan Indo-Myanmar border hung loh an duh thu an lo puang tawh a, thu dang an la nei leh lo. ZORO pawhin an duh lo a, anni phei hi chuan an duh lo na lehzual a, duh lohna lantir pawh an tum hnai niin a lang.
Mizoram mipui zingah erawh Indo-Burma ramri hung duh zawk an pung sâwt viauin a lang. A chhan ber nia lang chu Myanmar aṭanga ruihhlo tawlhrûk a nasat vang leh Myanmar lam aṭanga rawn kalte hnawk tihna vang a ni berin a hriat.
Ramri hung duhtute zinga tam tak chu Zo hnam inpumkhatna lam tuipui pha vak lote leh ṭhangthar zawkte an ni mai thei. Hei hi India mi nihnaah ṭhangtharte ngheh tawhzia tilangtu a ni mai thei bawk.
Myanmar aṭangin ruihhlo a rawn luh nasat miau avangin, tun dinhmuna ruihhlo hluarzia ngaihtuah chuan ramri hung hi thil ṭha zawk a nih ngei a rinawm. Ramri hung ni se, ruihhlo tawlhrûk a rêm vek loh pawhin a tlahniam ngei ang.
Chutih rualin, tun hun chauh ni lo, nakkin hun–tun aṭanga kum 10, 20, 50 leh chu aia rei pawh thlir tel a ṭul awm e. Ramri hung a nih tawh chuan ṭhiah leh mai mai theih a ni tawh kher lo ang. Hun a kal ang a, India ram dinhmun leh Mizoram dinhmun la inthlâk burh hun la thleng ve thei a ni; chung hunah chuan ramri hung hi Mizoram leh India rama Mizote tan a la hnawk viau thei.
Ramri hung chungchang hi ngun taka ngaihtuah ngai a ni. Sorkar, pawl leh mipuite hian ramri hung chungchangah Mizo ram leh hnam tana ṭha ber tur fîm takin ngaihtuah ila; thutlukna fuh lo, nakina kan la inchhîr leh lohna turin a ṭhatna leh ṭhat lohna te, a nghawng turte uluk takin i ngaihtuah ang u.
Hun kal zel tur thlir chungin ramri hung hi ram leh hnam tana ṭha zawk tur a nih chuan rang zawka hung a nih theih nan hmalak ni se; ṭha lo zawk tur a nih erawh chuan state sorkar leh mipuiin na taka dodal a ṭha ang.