Aikal lak leh pisa hun vawn dik loh

Tun hnai May 1, 2025-a Secretariat Conference Hall-a Environment, Forest & Climate Change department hnathawh thlir letnaah Chief Minister-in, sorkar hnathawk zingah aikal la an awm tawh loh an beisei thu leh aikal la an la awm a nih chuan action lak nghal tur a nih thu a sawi.

CM hian sorkar officer zingah sorkar bungrua an kawl theih chin bâk kawl an la awm chuan a rang lamin kîr vek se a finthlak tur thu te, sorkar hnathawkte'n hun an vawng dik tur a ni a, an hlawh phûin hna an thawk tur a nih thute a sawi bawk.

Chief Minister thusawi hi a pawimawh hle mai a, dan ang taka kal tur leh thil ti tura sorkar hnathawkte beiseina leh hriattirna a ni a; sorkar hnathawkte'n zâwm vek theih se a ṭha.

Sorkar hotute'n sorkar hnathawkte dan dik taka kal tur te, thil ti tur te, eirûkna laka fihlîm tur emawtea an beisei thu an sawi hian sorkar hnathawkte vauna anga sawi lui ṭâlh an awm ṭhin. Hetiang hi chu sorkar hnathawkte thil dik lo ti tur leh sorkar laka vui leh lungawi lo tura fuihpawrhna thil a ni a; tun hnuah chuan awm tawh lo se a duhawm.

Dan loa thil tite dan anga hrem an nih hian invuipui chiam chi a ni lo. Dan ang taka thil tih zel hi sorkar hotu te, sorkar hnathawk te, opposition political party te, mipui nâwlpuite ngaih pawimawh tur leh tih tur a ni.

Tunah hian sorkar hnathawk zingah pisa kai huna thleng lo eng emaw zat an la awm niin a lang a; hei hi sorkara thuneitute'n an en zui a ṭul. Aikal lâk chungchang leh sorkar bungrua (lirthei, etc.) dan loa kawl chungchang pawh thuneitute'n an vil zui a ṭul bawk. Thusawi ṭha tak hi a taka bawhzui a ngai ṭhin si a.

Hun vawn dik hun Mizo nunphunga ber tlat ni thei se, chumi tur chuan mi tinin mawhphurhna kan nei. Sorkar hnathawkte hian pisa kai hun hi dik takin vawng se, Mizo nunphungah awmzia thui tak a neiin a rinawm.

CM-in a sawi angin, tun thlenga aikal la an la awm a nih chuan sorkarin dan ang takin hrem ngei tawh rawh se; aikal la an la awm leh awm loh pawh a remchan angin enfiah a ṭul ang. Pisa kai hun pawh sorkar hnathawkte'n tun aia an vawn dik lehzual theih nan sorkarin hma la se, sorkar duh dan leh hmalaknate hi department leh pisa tina hotute pawhin ṭha takin kengkawh rawh se.