MUHCS-ah indâwr nawn rawh se
Chief Minister chuan May 2, 2025 khan dialysis centre a hawnnaah, sorkarin damdawi-inte tichangtlun turin theihtawp chhuah mah se, sorkar hmunhmain damlote a daih sên loh avangin private clinic leh hospital-te thawhpuina sorkarin a mamawh thu a sawi.
CM thusawi hi thil nihna dik tak niin a lang. Mizoram Universal Health Care Scheme (MUHCS) kalpui a nih tawh avang leh Mizorama private hospital tam berin an la zawm ve si loh avangin sorkar damdawi-inte nasa taka thuam ṭhat a ngai. Sorkarin ṭan a la viau niin a lang a, a lawmawm. Sorkar damdawi-inte hi thawktu, hmunhma leh bungruaahte tun aia a changtlun lehzual theih nan theihtawp chhuah zui zel rawh se.
Sorkar damdawi-inte changtlung ve tial tial mah se, private hospital-te hi mipui tan pan loh theih a ni lo. Rîkrum thilah damdawi-in hnai apiang pan a ni ṭul fo a; hmanrua leh bungrua sorkar damdawi-ina awm lo, private hospital-te'n an neih si a awm a, chungte avang chuan private hospital-te pan loh theih loh a ni ṭhin bawk. Chuvangin, mipui ṭhat tlanna leh hamṭhatna atan sorkar leh mimal damdawi-inte an thawhho ṭhat a ngai.
Private hospital tam berin MUHCS an zawm lo a, chutih laiin, an zinga eng emaw zat chu mipuiin an pan nasatte an ni si. Hei vang hian CM-in private clinic leh private hospital-te thawhpuina sorkarin a mamawh thu a sawi hian MUHCS kaihhnawih thil a kâwk deuh bik mai thei.
MUHCS chungchangah hian sorkar leh mimal damdawi-inte'n ngaihtuahna thar an hman ve ve a ṭul. Thil rêng rêng hi mahni chanah han dah hian mite rilru a hriatthiam theih ṭhin a; mite harsatna, lungngaihna leh lawmnate a hriatthiampui theih ṭhin. MUHCS chungchangah pawh an rilru ve ve turte inhriatthiampui chungin sorkar hotute leh private hospital pawl hotute hi indawr nawn leh ngei teh se.
Sorkarin mimal damdawi-inte harsatna leh hlauhthawn hi an hriatthiampui a ngai. Private hospital pawl pawh an inngaihtuah nawn a ṭha; thla khat chhung MUHCS kalpui tawh aṭangin an hlauhthawnte hi hlauhthâwn zel chi a nih leh nih lohte pawh hriat theih a ni tawhin a rinawm.
MUHCS-ah sorkar damdawi-in leh mimal damdawi-inte hrût rual veka damlo tana pawisa pek nghal ngai lo (cashless) vek tura tih hi mipui tana ṭha ber a ni lo mai thei a, thil remchang a ni lo thei. Mimal damdawi-inte tan pawh an hlauhthawn hi a hlauhthawnawm tawh lo thei bawk. Inhawng taka an indâwr nawn leh a ngai a ni.